Sersaxî ji malbata şehîd Cuma Şakir re hate xwestin

KOBANÊ

Bi sedan şêniyên kantona Kobanê, şervanên YPG û YPJ’ê, endam û rêveberên saziyên sivîl berê xwe da konê sersaxiyê yê şehîd Qurşîn (Cuma Şakir) ku li gundê wî Berxbotanê yê başûrê bajarê Kobanê û sersaxî ji malbata wî re xwest.

Şervanê YPG`ê Cuma Şakir (Qurşîn) ku di qonaxa dawîn a pêngava Bagera Cizîrê de şehîd bûbû, duh li Goristana Şehîd Dîcle hate oxirkirin.

Merasîma sersaxiyê bi deqeyeke rêzgirtin dest pê kir. Piştre endamê rêveberiya Tevgera Civaka Demokratîk (TEV-DEM) Abdulrehman Demir axivî û sersaxî ji malbata şehîd re xwest û wiha got: “Şehîd Qurşîn di hemleya Bendava Tişrîn, Minbic, Tebqa, Reqa cihê xwe girt û herî dawî di hemleya Dêrazorê de şehîd bû. Şehîd Cuma hevalekî fedekar bû, em jî soza şopandina rêya wî didin.”

Paşê li ser navê Têkiliyên Giştî ya QSD`ê Ezîz Ehmed axivî û destnîşan kir ku hemû destkeftiyên Rojava û Bakurê Sûriyeyê bi xwîna şehîdan hatine bidestxistin û wiha dewam kir: “Em soza şopandina rêya şehîdan nû dikin û em ê xeyalên wan pêk bînin.”

Merasîm bi tilîliyên dayikan û dirûşmên “Şehîd namirin” bi dawî bû.

(hk)

ANHA