Şaredariya Girkê Legê riya sereke sererast dike

RAPERÎN TEHLO – SEYDO ÎBO / QAMIŞLO

Rê û kolanên sereke yên navenda navçeya Girkê Legê ji ber baran û lehiyan û xebatên avakirinê di bajêr de têk çûne. Her wiha gelek avahiyên nû hatin avakirin û heta niha riya van avahiyan nehatiye qîrkirin.

Bi armanca sererastkirina van rê û kolanan welatiyên Girkê Legê gelek daxwazname pêşkêşî Şaredariya Gel kirin.

Nûçegihanên ANHA'yê serdana navçeyê kirin û nêrînên welatiyan derbarê rewşa rê û kolanan de wergirtin.

Ajokarê bi navê Ebdilkerîm Hemdan girêdayî mijarê got ku ji ber têkçûna rê ew nikarin ajokariyê bikin û gelek caran siwareyên wan ji ber çalên di nava kolanan de xirab dibin.

Ajokarê bi navê Elî Ezîz jî bang li aliyên têkldar kir ku van rê û kolanan di demeke lezgîn de çareser bikin û vê pirsgirêka hatûçûnê çareser bikin.

Mihemed El-Hisên El-Ebîd dukandarekî li ser riya Siwêdiyat a Girkê Legê ye got ku gelek rê axî ne û hêjî nehatine qîr kirin û di encama hatûçûnê de toz û telaz radibe û dukandar gelekî tengezar dibin.

Şaredariya Gel daxwaza welatiyan bersivand

Şaredariya Gel a Girkê Legê li ser daxwaznameyên welatiyan dest bi projeya sererastkirina rê û kolanan kir. Rayedarên Buroya Pîşeyî ji ANHA'yê re diyar kirin ku dê hemû rê û kolanên di hundirê Girkê Legê de pîne û sererast bikin.

Li gorî hevserokê Şaredariya Gel a Girkê Legê Silêman Hesen lêçûna projeyê nêzî 25 milyon lîreyên Sûriyeyê ye.

Hesen da zanîn ku têkçûna van riyên Girkê Legê ji ber gelek sedeman e û hin ji van sedeman baran, lehî û xebatên avakirinê ne. Hesen got ku piştî evan rê û kolan bêne sererastkirin dê du çerxeriyan li dergehên bakur û rojhilatê navçeyê ava bikin da ku pirsgirêka hatûçûnê bête çareserkirin.

Şaredariya Gel tevî hemû kêmderfetan bi hemû hêza xwe tevdigere û xizmeta welatiyan dike.

ANHA