'Ji bo çareseriyê emê hewl bidin bi her kesî re bicivin'

KOBANÊ

Partiya Sûriyaya Pêşerojê bi armanca pênasekirina partiyê û nerîna wê ya siyasî li navçeya Sirînê civîna gel lidar xist.Di civînê de armancên partiyê hate ravekirin. Hevserokê Partiya Sûriyaya Pêşerojê Îbrehîm El-Qeftan, Endamên Pariyê yên herêma Firatê û bi dehan welatiyên navçeyê beşdarî civînê bûn.

Civîn bi rêzgirtinê destpê kir, paşê Serokê Partiya Sûriyaya Pêşerojê Îbrehîm El-Qeftan axivî û got ku dema aloziya Sûriyê destpê kir, hin aliyên opozisyonê yên çekdar wekî Artêşa Azad bê pername bûn û wiha dom kir: "Tu bernameyên wan ji bo Sûriyaya pêşerojê nîn bû. vê yekê alozî hîn kûrtir kir."

El-Qeftan her wiha da zanîn ku çareseriya aloziya Sûriyê ew ku bernameyek ji bo Sûriyaya pêşerojê pêwîste û wiha dom kir: "Divê bernameyê de divê yekîtiya xaka Sûriyê li ser esasê ne navendîbûnê were parastin. Îro hemû hewl didin ku çareseriyê dînin, lê pirsa xwe beriz dike ew e gelo wê çareseriyên wan li gorî berjewendiyên gelê Sûriyê be."

Paşê beşdaran pirsên xwe derbarê partiyê û aramcnên wê kirin. El-Qeftan bersiva pirsên wan da û got ku wê bîroyên partiyên li hemû herêmên Sûriyê werin vekirin û da zanîn ku pirojeya wan çareserkirina aloziya Sûriyê û rizgarkirina gelê wê ye.

(dc)

ANHA