Xelkê Efrîn û Şehba şehîd Îlan Efrîn û Elîşêr Efrîn oxir kirin

Bi sedan xelkê kantona Efrîn û Şehba cenazeyên şehîd Îlan Efrîn û Elîşêr Efrîn li Goristana Şehîdên Berxwedana Serdemê oxir kirin.

ROJANE

4 hezîran, 2024 23:24

ŞEHBA

Şervanên Hêzên Sûriya Demokratîk (QSD) şehîd Îlan Efrîn (Mihemednûr Hikmet Reşîd) û Elîşêr Efrîn (Mihemed Hemîd Îbîş) di 31ˊê Gulanê de dema li ser erka xwe bûn, şehîd bûn.

Bi sedan xelkê kantona Efrîn û Şehba cenazeyên her du şehîdan ji pêş Nexweşxaneya Avrîn a li navçeya Fafînê wergirtin û bi karwanekê berê xwe da Goristana Şehîdên Berxwedana Serdemê ya li navçeya Ehrezê.

Li goristanê li ser navê Meclisa Malbatên Şehîdan a Efrîn û Şehba Hesen Bilko sersaxî da malbatên her du şehîdan û got: "Em ê heta pêkanîna armancên şehîdan li ser şopa wan bin."

Dûre li ser navê Yekîneyên Parastina Gel (YPG) yek ji fermandaran Cemîl Efrîn axivî û got: "Her du şehîdan karê xwe bi temamî dikir û di oxira vî gelî de canê xwe da."

Piştre wesîqeyên her du şehîdan hatin xwendin û radestî malbatên wan hatin kirin.

Her du şehîd di nava tilîliyên dayikan de hatin oxirkirin.

(fr)