Şêniyên Til Hemîsê sersaxî da malbata şehîd Nîdal El Mihemed

Şêniyên navçeya Til Hemîsê sersaxî da malbata endamê Hêzên Ewlekariya Hundirîn Nîdal Îbrahîm El Mihemed û soz da ku têkoşîna şehîdan berdewam bikin.

ROJANE

27 nîsan, 2024 15:01

QAMIŞLO

Bi dehan şêniyên navçeya Til Hemîsê, endamên saziyên sivîl, part, rûspiyên êlên Ereb li gundê Xiwêle El Raîdat ê navçeyê kom bûn û sersaxî da malbata endamê Hêzên Ewlekariya Hundirîn Nîdal Îbrahîm El Mihemed ku 25`ê Nîsanê li herêma Cinûb a navçeyê şehîd bûbû.

Di merasîmê de, endamê rêveberiya Meclisa Malbatên Şehîdan a navçeya Til Hemîsê Hemze El Mihemed axivî û got: "Destpêkê em sersaxiyê didin xwe û malbata şehîd. Em bi şehîdên xwe serbilind in."

Endamê Meclisa Rûspiyan a herêma Cizîrê Hesen El Ferhan jî got: "Bi saya fedakariyên şehîdan, plan û komployên komên terorîst û dewleta Tirk a dagirker bi bin ketin."

Endamê rêveberiya Hêzên Ewlekariya Hundirîn Ferhan El Salim jî soz da malbatên şehîdan ku tola şehîdan hilînin û li pêşiya dijminan bibin bendeke asê.

Malbata şehîd Nîdal fedakariyên şehîdan silav kirin û soz da ku rêya wan bişopînin.

Di dawiya merasîmê de wesîqeya şehadetê ya şehîd Nîdal hate xwendin û radestî malbatê hate kirin.

(şx)

ANHA