Li Hesekê tevgera li bazaran kêm bûye

Tevgera li bazara Hesekê di kirîn û firotinê de gelekî kêm bûye. Piştî ku madeyên sotemeniyê biha bûne û dolar jî ne diyar e kengî rabe yan dakeve, bandoreke neyînî li ser tevgera bazarê kiriye. Welatî û xwediyên dikanan anî ziman ku niha tenê pêdiviyên xwe yên sereke digirin û wekî dîtir pereyên wan têrê nake tiştên dîtir bikirin. 

Welatiyê bi navê Hemed Egla El Mihemed ê ji bajarê Hesekê got: "Nirxê lîreya sûrî li beramberî dolarê amerîkî gelekî daketiye û madeyên sotemeniyê biha bûne. Rewşa me ya aborî nikare vê yekê rabike. Ez bang li aliyên têkildar dikim bila buhayê kel û pelan têxin bin kontrolê de û buhayê madeyên sotemeniyê daxin."

Dikandar Mihemed Rislan ê ji Hesekê ji bo rewşa bazara Hesekê wiha axivî: "Tevgera kirîn û firotinê li bazara Hesekê kêm bûye. Heke demsala çinînê bi dawî bibe û buhayê madeyên sotemeniyê dakevê, dibe ku rewşa bazarê baştir bibe û tevger çêbe.”

Ji bo tevgera bazarê çalak bibe Rislan wiha got: "Heke pirsgirêka bêkariyê çareser bibe, gumrik kêm bibe û buhayê kel û pelan têkeve bin kontrolê de dê tevgera li bazarê çalak bibe."

Welatiyê bi navê Omer El Genas nêrîna xwe li ser rewşa bazara Hesekê anî ziman û got: "Îsal, ji ber gumrik zêde bûye û madeyên sotemeniyê biha bûne tevgera bazarê kêm bûye. Vê yekê bandor li ser çandinî û rewşa aborî ya herêmê kir. Êdî kel û pel biha bûne. Ji bo tevgera li bazarê çalak bibe divê pirsgirêka bêkariyê were çareserkirin û saziyên şopandinê karê xwe bikin û bazarê kontrol bikin."

(np)

ANHA