Konferansek taybet der barê ji nû ve tevlikirina civakî ya kesên ku ji kampa Holê vedigerin

Di konferansê de nûnerên saziyên sivîl û Partiya Sûriyeya Pêşerojê û Partiya Yekitiya Demokratîk (PYD) û hemû rêxistinên navneteweyî û xwecih ên Bakur û Rojhilatê Sûriyeyê beşdar bûn.

Di serî de hevserokê Meclisa Sivîl a Reqayê Mihemed Nûr El Dîb bixêrhatina beşdaran kir û makanîzma veguhastina malbatan ji kampa Holê û tunebûna destekê ji bo wan şîrove kir û got: "Plansaziyek saxlem ji aliyê Navenda Lênêrîna Civakî ve ji bo tevlikirina şêniyên ku ji kampa Holê derdikevin û pêşkêşkirina alîkariya derûnî û peydakirina derfetên kar ji bo wan, hat danîn."

Piştre, hevserokê Komîteya Karûbarên Civakî û Xebatê Cîhad Hesen got: "Em îro rûpela zehmetiya gelê Sûriyeyê diqulibînin û civîna me ya îro bi beşdariya hemû rêveberî û rêxistinan nîşan dide ku Rêveberiya Xweser ji bo xelasiya gelê Sûriyeyê dixebite."

Hesen wiha domand: "Divê em bi hemû saziyên xwe hevgirtî bin û destekê bidin van malbatan û bihêlin rêxistinên cîhanê destekê bidin wan."

Piştre hevseroka Komîteya Karûbarên Civakî û Xebatê Lîna El Casim Navenda Lênêrîna Civakî da naskirin û plansaziya wê ya tevlikirina malbatên ku ji kampa Holê vedigerin û rola wê di vê pêvajoyê de şîrove kir.

Endamê Komîteya Karûbarên Civakî û Xebatê Mihemed El Hadî pêdiviyên wan malbatan anîn ziman wek peydakirina cih û xwarinê û ewlehiya xwarinê û aramiyê û xwestina destekê ji rêxistinan ji bo wan û got: "Pêwîst e em girîngiyê nedin cihekî tenê û taybet, ji ber ku malbatên ku ji kampa Holê vedigerin li seranserî Bakur û Rojhilatê Sûriyeyê belav bûne."

Di dawiya konferansê de encamnameyek hat danîn û ji aliyê Cîhad Hesen ve hat xwendin:

1- Damezirandina lênûseke taybet ji bo her kesekî ji malbatên ku ji kampa Holê vedigerin re, ku navê wê Lênûsa Lênêrîna Civakî be ku ji aliyê komîteyên Meclisa Sivîl a Reqayê û hemû rêxistinên wê ve bê bikaranîn.

2- Damezirandina komxebatekê bi navê Navenda Lênêrîna Civakî ku ji 2 beşan pêk bê, beşek taybet bi komîteyên Meclisa Sivîl a Reqayê û yek taybet bi rêxistinên li Reqayê.

 3- Pirkirina projeyên dema bê ji bo malbatên ku ji kampa Holê vedigerin ji bo ku hemû pêdiviyên wan bên peydakirin.

4- Derxistina van malbatan li ser çapemeniyê.

5- Pêşxistina koordînasyona di navbera rêxistinan, Komîteya Karûbarên Civakî û Xebatê û Navenda Lênêrîna Civakî de.

Tê payîn ku Navenda Lênêrîna Civakî di çend rojên bê de dest bi karê xwe bike.

(mh)

 ANHA