Komînên Çilaxa konferansa xwe li dar xist

Li bajarê Çilaxa yê kantona Cizîrê bi beşdariya pêkhateyên bajar Kurd, Ereb, nûnerên partiyên siysî, saziyên Rêveberiya Xweseriya Demokratîk, Meclisa Malbatên Şehîdan, rûspiyên eşîran û endamên komînan, konferansa taybet a komînan hat lidarxistin.

Konferansa bi dirûşma "Komîn bingeha avakirina aştî û civaka demokratîk e" hat lidarxitin bi deqeyek rêzgirtin dest pê kir. Piştre Yûnis Hacî û Niza Seyfedîn nirxandinên Rêber Abdullah Ocalan ên der barê girîngiya komînan de bi zimanên kurdî û erebî xwendin.

Piştre jî benda têkildarî rêxistinkirina komînan a di hevpeymana civakî ya Herêma Bakur û Rojhilatê Sûriyeyê de hat xwendin û rêbazên pêşxistina komînan hatin nîqaşkirin.

Di nîqaşan de pirsgirêkên li  pêşiya komînan, bi taybetî di aliyê rêxistinî û hemahengiyê de hatin vegotin. Hate diyarkirin ku divê tevahî komîteyên komînan, bi taybetî jî komîteyên parastinê werin aktîfkirin û rola komînan wekî lêvegera bingehîn a xebata civakî were sepandin.

Di konferansê de ji bo pêşxistina komînan de pêşniyar hatin kirin. Hat gotin, divê komîngehan li gund û bajar werin avakirin, projeyên xizmetguzarî û kooperatîf werin vekirin, civînên zanistî ji endamên komînan re werin lidarxistin û bendên hevpeymana civakî werin şîroveirin. Pêşniyar hat kirin ku dersên li ser komînan derbasî minhacên pewerdeyê yên dibistanan werin kirin.

Zehmetî û pêşniyarên ku di civînê de hatin vegotin hatin nîvisandin da ku di konferansa giştî ya komînan a li ser asta kantona Cizîrê werin nîqaşkirin û der barê yekkirina xebatên komînan de mekanîzmeyeke hevpar were dayîn.

(bb)

ANHA