Koçberên Serêkaniyê li ber avahiya NYʹyê ya Qamişloyê çalakiyek li dar xist

Bi boneya salvegera 5`an a dagirkirina bajarên Serêkaniyê û Girê Spî ji aliyê dewleta Tirk a dagirker ve li pêşiya avahiya Komîseriya Penaberan a NY`ê Komîteya Koçberên Serêkaniyê çalakiyeke protestokirinê orgenîze kir.

Koçberên Serêkaniyê, endamên Hevgirtina Rewşenbîrên Rojavayê Kurdistanê (HRRK), saziyên civaka sivîl û nûnerên ji Rêveberiya Xweser a Kantona Cizîrê beşdarî çalakiyê bûn.

Çalakvanan pankartên bi nivîsa “Em rojekê vegerin Serêkaniyê”, “Daxwaza me bidawîkirina dagirkeriyê ye” û “Na ji guhertina demografî re” rakiribûn.

Piştî deqeya rêzgirtinê endamê Komîteya Koçberên Serêkaniyê Reyan Exte nameya ku dê radestî avahiya Komîseriya Bilind a Kar û Barên Peaberan a NY`ê ya li bajarê Qamişlo bikin, xwend.

NAMEYA KOMÎTEYA KOÇBERÊN SERÊKANIYÊ

Komîteyê di nameya xwe de diyar kir ku dewleta Tirk a dagirker û çeteyên girêdayî wê li Serêkaniyê û Girê Spî li dijî mafên mirovan, zagonên navnetewî, hevpeymanên NY`ê yê ku parastina sivîlan dikin sûcan pêk tînin.

Di nameyê de Komîteya Koçberên Serêkaniyê ev daxwaz kirin; “Li Efrîn, Serêkaniyê û Girê Spî rê li ber siyaseta guhertina demografî û kiriyarên li dijî mirovahiyê bê girtin. Dewleta Tirk kiryarên li dijî mirovahiyê dike û li gorî hevpeymanên peydakirina ewlehiyê yê ku îmze kirine tev nagere, lewma divê kiryarên wê bên şermezarkirin. Em daxwazê ji we dikin ku hûn bi gelên li Bakur û Rojhilatê Sûriyeyê bi taybet yên Serêkaniyê û bajarên dagirkirî yên Sûriyeyê  re alîkar bin, da ku dagirkeriyê û rêxistinên terorîst ên destekê ji dewleta Tirk dibin, têk bibin. Zêdetir zextê li dewleta Tirk û çeteyên girêdayî wê bikin da ku ji herêmên ku li Sûriyeyê dagir kirine vekişin.”

Piştî xwendina nameyê çalakvanan ji bo bîranîna şehîdên êrişa dagirkeriyê li dijî Serêkaniyê û Girê Spî 5 deqeyan rawestiyan. Ji komîteyê şandeyekê name radestî avahiya Komîseriya Penaberan a NY`ê kir.

(sb)

ANHA