Gerînendetiya Tenduristiyê ya Hesekê xebatên entegrasyonê didomîne

Di çarçoveya pêvajoya entegrasyonê ya li gorî Peymana 29`ê Çileyê de, Gerînendetiya Tenduristiyê ya Parêzgeha Hesekê xebatên têkildarî entegrasyonê yên kadroyên navandên tenduristiyê yên girêdayî Rêveberiya Xweser û Gerînendetiya Tenduristiyê ya Parêzgeha Hesekê didomîne.

Gerînendeyê Tenduristiyê yê Parêzgeha Hesekê Dr. Xalid El Xalid ji ajansa me re axivî û got: “Me dest bi xebatên entegrasyonê kiriye, di nava xebatê de dosyayên nexweşxaneyên Serêkaniyê û Şedadê jî hene, her wiha kadroyên ku di nava Rêveberiya Xweser de dixebitîn. Me agahiyên der barê kadroyan de kom kirin û şandin ji wezaretê re.”

Xalid El Xalid got: “Li gorî qanûnên karmendan, lîsteya kadroyên tibî yên Rêveberiya Xweser hatin qebûlkirin. Ji 3 rojan ve dest bi çêkirina peymanan hatiye kirin.”

El Xalid behsa hûrgiliyên lîsteyan kir û wiha anî ziman: “Hejmara karmendên ku dest bi îmzekirina peymanên wan hatiye kirin, hezar û 448 e, 184 navên din jî hene hîn li benda sererastkirina bawernameyên xwe ne. Di nava wê lîsteyê de hinek hene bawernameyên qonaxa navîn û amadehî bi dest xistine, hinek jî ji Zanîngeha Rojava derçûne. Karmendên nexweşxaneyên Serêkaniyê û Şedadê dê îmzekirina peymanên wan di rojên bê de pêk were.”

Xalid El Xalid got: “Planeke me ji bo nûkirina binesazî û alavan heye, ev plan ji bo herêmê planeke qonaxî ye, ji bo piştgiriya xebatê di hemû navendên tenduristiyê de û ji nû ve xebitîna hinek navendan jî planeke me ya esasî heye. Hinek pirsgirêk hene ku dive bên çareserkirin. Vekirina nexweşxaneya zarokan li Hesekê jî nêz bûye, wê navenda şûştina gurçikan li Dirbêsiyê û Şedadê bê vekirin. Her wiha dê navenda dermankirina girêkan jî li parêzgehê bê nûkirin.”

Di dawiyê de Xalid El Xalid got: “Gelek aliyên xebata tenduristiyê hene, li cem me 104 navendên tenduristiyê û 6 nexweşxane hene, her wiha gelek bernameyên tenduristiyê li parêzgehê hene. Niha derfetên me sînordar in, Wezareta Tenduristiyê dê piştgiriyeke mezin bide.”

(sb)

ANHA