Bi boneya Roja Cîhanê ya Mamosteyan çalakî

Yekitiya Mamosteyan a kantona Efrîn û Şehbayê yên li kantona Tebqayê bi cih bûne, bi boneya Roja Cîhanê ya Mamosteyan, daxuyaniyek da. Di daxuyaniyê de îşaret bi bandora koçberiyê û êrişên dewleta Tirk li ser perwerdehiyê hate kirin. 

Di dewama daxuyaniyê de ku li stargeha demkî ya li bajarê werzîşê, ji aliyê endamên yekitiyê Fatme Kilkawî û Fatme MIhemed ve hatiye xwendin, hate diyarkirin ku tevî şert û mercên dijwar, lê mamosteyên yekitiyê hewldanên xwe dikin ji bo ku pewerdehî berdewam bike û pêş bikeve.

Di daxuyaniyê de hate gotin ku divê piştgiriya hewldanên mamosteyan û rola wan di avakirina civakê û nifşên bê de bê kirin û bang kirin ku ji bo temamkirina karê xwe, tiştên pêwîst ji mamosteyan re bên pêşkêşkirin.

Di daxuyaniyê de îşaret bi dabînkirina vegereke ewle ji koçberan re hate kirin û hate diyarkirin ku çareseriya êşên ku dijîn û pêşxistina perwerdeya bi zimanê zikmakî, veger e.

Di daxuyaniyê de banga bidawîkirina dagirkeriyê û siyasetên guhertina demografiyê û bicihanîna bendên lihevkirina 10`ê Adarê hate kirin. 

AMÛDÊ

Li bajarê Amûdê jî mamosteyan, malbatên şehîdan, nûnerên saziyên sivîl, Meclisa Malbatên Şehîdan, koçberên Efrîn û Şehbayê li goristana Şehîd Îsmaîl Hogir kom bûn û daxuyaniyek dan.

Di daxuyaniyê de bang li rêxistinên navneteweyî, UNESCO û UNICEF`ê hate kirin ku ji bo rawestandina êrişên dagirkeriya Tirk li dijî saziyên perwerdehiyê, dabînkirina hawîrdoreke ewle û aram, çareserkirina doza koçberan destwerdanê bikin û piştgiriya vê saktorê bikin.

 Di dawiyê de beşdaran gul danîn ser gorên şehîdan û mûm vêxistin.

(şx)

ANHA

TEBQA