Karwanê cenazeyên 23 şehîdan bi rê ket
Cenazeyên 23 şehîdên Akademiya Têkoşîna Dijî Madeyên Hişbirê ber bi goristanên şehîdan ên bajarên Dêrik, Qamişlo û Hesekê ve derxistin rê.
Ji saetên serê sibehê ve malbatên şehîdan û bi sedan şênî li bajarên Dêrik, Qamişlo û Hesekê li pêşiya Nexweşxaneya Nîştimanî ya Dêrikê û morga nexweşxaneyên li Qamişlo û Hesekê kom bûn da ku cenazeyên şehîdên Hêzên Ewlekariya Hundirîn ên di êrişa dewleta Tirk a dagirker li herêma Koçeratê ya Dêrikê (8 Cotmeh) de şehîd bibûn, werbigirin.
Dema wergirtina cenazeyan de dengê dirûşmeyên dilsoziya bi şehîdan re û tolhildanê yên mîna “Bi can bi xwîn em bi te re ey şehîd” û “Em xwîna wan li erdê nahêlin” û dengê tilîliyan bilind bû.
Cenazeyên şehîdan li ser milan hatin rakirin û di van kêliyan de karwanê cenazeyên şehîdan ber bi Goristana Şehîd Xebat Dêrik a Dêrikê, Goristana Şehîd Delîl Saroxan a Qamişloyê û Goristana Şehîd Dijwar a Hesekê ve bi rê ketin. Li her sê goristanan jî girseyên gel li benda gihîştina cenazeyên şehîdan in. Dê 23 şehîd bi merasîmên girseyî werin oxirkirin.
Li Goristana Şehîd Xebat Dêrik ji bo şehîd “Ednan Yûsif, Silêman Enter, Xwînrêj Temê, Mûaz Eta, Ehmed El Xidir, Mihemed El Eswed, Ebdulezîz Elî, Yezen El Keço, Mihemed Xalid û Ebdulwahid El Ehmed” yên ji navçeyên Girkê Legê, Çilaxa, Dêrik û Til Koçerê merasîm tên lidarxistin. Dê cenazeyên wan jî li Goristana Şehîd Xebat Dêrik û Goristana Uqab El Eswed a Til Koçerê werin defnkirin.
Lo Goristana Şehîd Delîl Saroxan jî ji bo şehîd “Ehmed Xalid El Elî, Salih El Dendûş, Bessam El Hisên, Alan Nazim, Mehmûd El Wero, Feyad El Hedmol û Mihemed Şemdîn” ên ji bajarê Qamişlo, navçeyên Tirbespiyê û Til Hemîsê merasîm tên lidarxistin. Piştre dê cenazeyên şehîdan li Goristana Şehîd Delîl Saroxan, Şehîd Dilşêr a li gundê Dugirê yê Tirbespiyê û Goristana Şehîdan a Til Hemîsê werin veşartin.
Ji bo şehîd “Lorans Suhêl Ebdî, Menaf Siûd Semîr, Salih Ebdulxefûr Yûsif, Îskender Hiso, Ezîz Elî Ebdo û Ebdullah Hesen Ilêwî” yên ji navçeyên Erîşe, Hol, Til Birak û bajarê Hesekê li Goristana Şehîd Dijwar a li Hesekê dê merasîm were lidarxistin. Cenazeyên şehîdan dê li Goristana Şehîd Dijwar, Goristana Şehîdan a Şedadê û Goristana Şehîdan a Til Hemîsê werin defnkirin.
Merasîmên oxirkirina şehîd Orhan Miho û Elî Osman jî dê saet 11:00`an li Goristana Şehîd Dîcle ya li bajarê Kobanê were lidarxistin.
(c)
ANHA
