Li 10 navendan komplo û êrîşên dagirkeriyê tên şermezarkirin

Li 8 navendên Bakur û Rojhilatê Sûriyeyê û bi hezaran kes dijî komploya navneteweyî ya li hemberî Rêber Abdullah Ocalan û êrişên dewleta Tirk a dagirker dimeşin. Li Helebê û Şehbayê jî wê meş bên lidarxistin.

NÛÇE

9 cotmeh, 2023 07:37

Îro salvegera destpêkirina Komploya Navneteweyî (9’ê Cotmeha 1998’an) ya li dijî Rêber Abdullah Ocalan û ji aliyê dewleta Tirk a dagiker û çeteyên wê ve dagirkirina Serêkaniyê û Girê Spî (9 Cotmeh 2019) ye.

Ji bo şermezarkirina komployê û dagirkirin û êrişên dewleta Tirk a dagirker ên ji 4`ê Comtehê ve bi dijwarî didomin, li 8 navendên Bakur û Rojhilatê Sûriyeyê bi dirûşmeya “Bi yekîtiya gelan em ê êrîşên faşîzma Tirk têk bibin û Rêber APO azad bikin” meşên girseyî tên lidarxistin.

Meş û xwepêşandanan li bajarên Dêrik, Qamişlo, Hesekê, Dirbêsiyê, Kobanê, Minbic, Reqa û Dêrazorê bi beşdariya hezaran kesan destpê kir. Di meşan de wêneyên Rêber Abdullah Ocalan, pankartên ku komplo û dagirkeriyê şermezar dikin hatin vekirin. Her wiha diruşmeyên berxwedan û tolhildanê tên berzkirin.

Her wiha li bajarê Helebê jî wê saet 12:00`an de, li navçeya Fafînê ya kantona Şehbayê jî saet di 15:30`an de meş destpê dikin.

(şx)

ANHA