Cenazeyên şehîd Ednan û şehîd Mecid hatin veşartin

Endamê Hêzên Ewlekariya Hundirîn Mecid Damin 5′ê Cotmehê di êrişa hewayî ya dewleta Tirk a dagirker a li ser gundê Til Hebeşê yê navçeya Amûdê de şehîd bû, welatiyê bi navê Ednan Ebdî jî di heman dîrokê de di êrişa dewlata Tirk de li mezreyên Mişêrfê Hemê ya bakurê bajarê Hesekê şehîd bû.

Bi sedan şêniyên Hesekê cenazeyên şehîd Mecid Damin û şehîd Ednan Ebdî ji navenda Meclisa Malbatên Şehîdan a bajarê Hesekê wergirtin û bi karwanekî ber bi Goristana Şehîd Dijwar a li gundê Dawudiyê ve bi rê ketin.

Li goristanê piştî deqeya rêzgirtinê endamê Meclisa Malbatên Şehîdan a Hesekê Mehmûd Cewad axivî û got, şehîdan soza dane tevahî pêkhateyan ku dê xaka xwe û destkeftiyên Şoreşa Rojava biparêzin.

Cewad soza şopandina xeta şehîdan da.

Ji fermandarên Meclisa Leşkerî ya Hesekê Dêrsim Hesekê şehîdên azadiyê bi bîr anîn û diyar kir ku dewleta Tirk a dîktator ji 12 salan ve bi rê û rêbazên cuda êrişî Rojava dike û komkujiyan pêk tîne.

Dêrsim Hesekê diyar kir ku dewleta Tirk a dagirker piştî hewldanên wê yên derxistina fitneyan li Dêrazorê têk çûn, bi hemû rêbazan êrişên xwe li ser Bakur û Rojhilatê Sûriyeyê gûr kiriye.

Dêrism Hesekê di dawiya axaftina xwe de diyar kir ku êrişên dewleta Tirk a dagirker çiqasî dijwar bin jî dê bê encam bin û got, ji ber pêkhateyên herêmê hevgirtî ne.

Piştre endama Meclisa Malbatên Şehîdan Rojda Ehmed wesîqeyên herdu şehîdan xwendin û radestî malbatên wan kirin.

Girse cenazeyên şehîd Mecid Damin û Ednan Ebdî bi dirûşme û tilîliyên dayikan spartin axê.

(bb)

ANHA