​​​​​​​Şêniyên Dêrazorê teqezî bi hesabpirsînê ji fesadan kir

Vê dawiyê li herêma Dêrazorê hewldanên derxistina fîtneyê derketin holê, nexasim piştî destpêkirina operasyona "Xurtkirina ewlehiyê" ya Hêzên Sûriyeya Demokratîk (QSD).

Der barê vê mijarê de, Mihemed El Ebdullah ê ji bajarokê Sewr got: "Ev fîtne bi armanca têkbirina aramiya herêmê ne. Em sekna xwe ya li hember van hewldanan nîşan didin, ev hewldan ji aliyê hêzên derve ve û bi armanca têkbirina projeya neteweya demokratîk in."

El Ebdullah wiha lê zêde kir: "Em li dijî fîtne û kiryarên terorîst li kêleka QSD'ê ne û heta pêkanîna aramiyê em ê li pişta hêzên xwe bin."

El Ebdullah destnîşan kir ku bûyerên li Dêrazorê ji aliyê ajandeyên derve ve hatin birêvebirin û got: “Bi saya hevgirtina gel û QSD’ê ev plan hatin têkbirin û em ê hesabê ji fesadan bipirsin.”

Ezawî El Herbî yê ji heman bajarokê got: "Em hemû destwerdanên ji derve di serî de milîsên Îranê û dewleta Tirk a dagirker û mudaxeleyên hikumeta Şamê red dikin. Em li kêleka QSD'ê ne ji ber ku wê aramiya herêmê pêk anî û şêniyên herêmê ji bindestiyê rizgar kirin."

El Herbî anî ziman ku bûyerên Dêrazorê bi armanca derxistina fîtneyê di nav eşîran de ne û got: "QSD'ê û gel van planan baş dizane û ew plan têk birin. Em bang li QSD'ê dikin ku xebatên xwe bilind bikin û hesabê ji fesadan bipirsin."

(mh)

ANHA