Xelkê Minbicê şehîdekî xwe oxir kir

Li goristana şehîdan a Minbicê merasîma oxirkirina endamê Hêzên Ewlekariya Hundirîn Salih Ebdulqadir li dar xist.

Di merasîmê de endamên Rêveberiya Sivîl a Demokratîk a Minbicê, Meclisa Malbatên Şehîdan, partiyên siyasî, rêxistinên civaka sivîl, Meclisa Leşkerî ya Mınbicê, Meclisa Leşkerî ya Jinan a Minbicê, Hêzên Ewlekariya Hundirîn, şêx û rûspiyên eşîran û bi sedan şênî beşdar bûn.

Di merasîmê de endama Meclisa Malbatên Şehîdan Meryem Cerîd axivî û wiha got: "Rêya me ya azadiya dirêj e, em hemû fedaiyên vê axê ne. Hûn şehîd bi fedakariyên xwe destkeftiyên şoreşa me dinivîsînin. Em li ser soza xwe ne û em ê mîrasa we biparêzin û li ser şopa wan bin."

Efserekî Hêzên Ewlekariya Hundirîn Mehmûd Cuma Ebdulqadir jî axivî û wiha got: "Dê Hêzên Ewlekariya Hundirîn parêzvanê xak û gelê xwe be û rojekê jî ji bo parastina gelê xwe dudilî nabe."

Dûre hevserokê Meclisa Rêveber Mihemed Xêr Şêxo li ser navê Rêveberiya Sivîl a Demokratîk a MInbicê axivî û got xelkê Minbicê bi hemû pêkhateyên xwe bi biratiya gelan bawer e û dê di oxira parastina ewlehî û îstîqrarê de canê xwe bidin.

Di dawiyê de wesîqeya şehîd Salih Ebdulqadir hate xwendin û radestî malbatê hate kirin.

(fr)

ANHA