Di merasîma sersaxiyê de ji xelkê Hesekê soza berdewamkirina têkoşînê

Şêniyên Hesekê, endamên saziyên sivîl, Hêzên Ewlekariya Hundirîn û Meclisa Leşkerî ya Hesekê, tev li merasîma sersaxiyê ya gerîla Egîd Serdar (Diyar Mardînî) û şervanê Hêzên Sûriya Demokratîk (QSD) Ronî Hesekê (Necmedîn Fenûş) bûn.

Şervanê HPG`ê Egîd Serdar destpêka Tebaxa borî li Zapê li Herêmên Parastinê yên Medyayê şehîd bûbû û şervanê QSD`ê Ronî Hesekê 29`ê Îlonê li bajarokê Şihêl ê Dêrazorê şehîd bûbûn.

Konê sersaxiyê li taxa Talaê ya Hesekê hatiye vedan. Di merasîmê de endamê Rêveberiya Meclisa Malbatên Şehîdan Mehmûd Cewad axivî û sersaxî da malbatên şehîdan. Cewad got: “Ji bo têkbirina komployên li dijî herêmê, şehîdan canê xwe feda kir. Em soz didin ku heta dawiyê şopdarên rêya wan bin.”

Ji fermandarên Meclisa Leşkerî ya Hesekê Dêrsim Hesekê axivî û fedakariyên şehîdan silav kir û wiha domand: “Em dev ji rêya şehîdên xwe bernadin. Wan di oxira parastina vê xakê û vî gelî ji komployan de, canê xwe feda kirin. Em dê heta dawiyê li ber xwe bidin û dê bi ser kevin.”

Endamê Rêveberiya Hêzên Ewlekariya Hundirîn Idrîs Oso jî axivî û sersaxî da malbatên şehîdan.

Oso got: “Têkoşîn û berxwedana me ji bo azadiyê û welatekî ewle, dê berdewam bike.”

Di dawiya merasîmê de wesîqeyên şehadeta her du şehîdan hatin xwendin û radestî malbatan hatin kirin.

(şx)

ANHA