Xelkê Efrîn û Şehba: Pevçûnên çeteyan bo guhartina demografîk in

Bi dehan xelkê Şehba û Efrînê yên li Minbicê, li kêlek edamên meclisên herêmê yên bajêr, endamên Meclisa Kombûna Jinan a Zenûbiya, partiyên siyasî, şêx û rûspiyên eşîran li pêş Nivîsgeha Rêxistinkirina Koçberên Şehba û Efrînê ya li Minbicê kom bûn û bi daxuyaniyekê sûcên dewleta Tirk a dagirker û çeteyên wê yên li Efrîna dagirkirî şermezar kirin.

Endama nivîsgehê Bêrîvan Mehmûd daxuyanî xwend. Di daxuyaniyê de hate gotin li herêmên dewleta Tirk a dagirker dagir kirine pevçûnên dijwar di nava Heyet Tehrîr El Şam û Ehrar El Şamê de ji aliyekî ve û komên Sultan Murad û hin komên din ên girêdayî Artêşa Nîştimanî ve ji aliyekî din ve rû didin. Di encama van pevçûnên li gund û bajaran çêdibin, welatî ji malbatên xwe koçber dibin.

Di daxuyaniya nivîsgehê de hate destnîşankirin ku di heman demê de li herêmên Bab, Cerablus, Ezaz û Efrînê sûcên revandin, girtinên ketober, dizîna mal û milkên wan tên kirin. Çete û dagirkeriyê biryara kontrolkirina mewsima zeytûnan li Efrînê da, her wiha bi alîkariya rêxistinên derve avahiyên mêtingehiyê li xaka Efrînê ava dikin û çeteyan li wan bi cih dikin da ku herêmê ji xelkê wê vala bikin û demografiyê biguherin.

Di daxuyaniyê de bang li civata navneteweyî û hemû rêxistinên hiqûqî hate kirin ku xelkê van herêman ji çeteyan rizgar bikin û wan ji herêmê derxin, da ku koçber li malên xwe vegerin, ewlehî û îstîqrar li herêmê çêbin.

(fr)

ANHA