Xelkê Minbicê şehîdekî xwe oxir kir
Cenazeyê şervanê Meclisa Leşkerî ya Minbicê şehîd Hesen Ehmed El Mirî li Goristana Şehîdan a Minbicê hat veşartin.
Cenazeyê şervanê Meclisa Leşkerî ya Minbicê Hesen Ehmed El Mirî yê dema erka xwe bi cih dianî şehîd bû bi merasîmeke girseyî li Goristana Şehîdan a Minbicê hat veşartin. Bi dehan şênî, endamên Rêveberiya Sivîl a Demokratîk a Minbicê, meclisên sivîl, Hêzên Ewlekariya Hundirîn, rêxistinên civaka sivîl, partiyên siyasî, şêx û rûspiyên herêmê, tevgerên jin û ciwanan û meclisên leşkerî beşdarî merasîmê bûn.
Di merasîmê de cîgirê hevserokatiya Meclisa Qanûnsaz a Rêveberiya Sivîl a Minbic û gundewarê wê Mihemed Adil axivî û got: "Dewleta Tirk a dagirker armanc dike gelên daxwaza mafên xwe dike û banga guhertina çarenûsa xwe dike, qir bike. Dewleta Tirk bi balafirên bê mirov ên biçek û bi çekên kîmyewî yên qedexekirî kesên bê guhen, zarok û xwendekaran qetil dike. Lê pîvan û qanûnên mafên mirovan ji bo wan sûcdaran derbas nabe."
Mihemed Adil di dawiyê de got: "Bi yekitiya xwe û bi vîna jinên azad û ciwanên şoreşger, her wiha bi sekna me ya bi meclisa me ya leşkerî re em ê tevahî armancên Erdogan û çeteyên wê têk bibin ku dixwazin yekitiya gelan û avakirina neteweya demokratîk têk bibin."
Endamê Meclisa Malbatên Şehîdan a Minbicê Huzeyfa Ebdo jî bal kişand ser fedakariyên şehîdan û anî ziman, rêya ku şehîdan xêz kiriye ronahiya siberojê ye û rêya serketin û rizgarkirinê ye.
Di merasîmê de ji fermandarên Meclisa Leşkerî ya Minbicê Mihemed Elî jî got, ew ê şopdarên xeta hevrêyên xwe yên şehîd bin û dê gel û welatê xwe ji êrişan biparêzin.
Piştre endamê Meclisa Malbatên Şehîdan Mihemed El Mewas wesîqeya şehadetê ya şehîd xwend û radestî malbata wî kir.
Cenazeyê şehîd bi dirûşmên dilsoziya bi şehîdan re hat veşartin.
(bb)
ANHA