Çalakiyên pîrozbahiya 20'emîn salvegera damezirandina PYD'ê didomin

Çalakiyên pîrozbahiya salvegera 20'emîn damezirandina PYD'ê li seranserî Bakur û Rojhilatê Sûriyeyê didomin.

NÛÇE

20 îlon, 2023 17:26

Vê sibê çalakiyên pîrozbahiya salvegera 20'emîn a damezirandina Partiya Yekitiya Demokratîk (PYD) li seranserî Bakur û Rojhilatê Sûriyeyê dest pê kirin.

Di vê çarçoveyê de PYD'ê şahiyek li navenda Çand û Hunerê ya Aram Tîgran a bajarokê Rimêlanê li dar xist. Di şahiyê de bi sedan şêniyên Girkê Legê, Rimêlan, endamên saziyên sivîl, endamên Kongra Star, Meclisa Malbatên Şehîdan, Tevgera Ciwanên Şoreşger ên Sûriyeyê, Tevgera Jinên Ciwan, nûnerên partiyên siyasî û hêzên leşkerî beşdar bûn.

Di serî de hevserokê nivîsgeha PYD'ê yê Girkê Legê Fuad Hisên der barê dîroka partiyê û rola wê di parastina ewlehî û aramiya herêmê ji plan û komployên dijber de anî ziman.

Hisên got: "Partiya me partiya şehîdan e û armanca wê parastina mîrasa şehîdan e. Ew ê li ser vê bingehê têkoşîna xwe bidomîne. Em soza şopandina şehîdan heta pêkanîna serkeftinê nû dikin."

Piştre peyamên pîrozbahiyê yên bi navê partiyên siyasî, saziyên sivîl, Meclisa Malbatên Şehîdan û Kongra Star ên navçeya Girkê Legê hatin xwendin.

Dûre sînevîzyonek li ser dîroka PYD'ê hate pêşandan û şahî bi govendan û stranên şoreşgerî bi dawî bû.

Her wiha, bi sedan şêniyên Til Koçer, endamên saziyên sivîl, Meclisa Malbatên Şehîdan, Tevgera Ciwanên Şoreşger ên Sûriyeyê, Tevgera Jinên Ciwan û nûnerên hêzên leşkerî û partiyên siyasî di şahiya ku li navenda Çand û Hunerê ya navçeyê hatibû lidarxistin de, beşdar bûn.

Di serî de bi navê PYD'ê hevserokê nivîsgeha partiyê ya navçeyê Taha El Selmo salvegera 20'emîn a damezirandina partiyê li malbatên şehîdan, Rêber Abdullah Ocalan û tevahiya şêniyên Bakur û Rojhilatê Sûriyeyê pîroz kir.

El Selmo soza şopandina rêya şehîdan heta pêkanîna azadiyê da û şahî bi govendan û stranên koma Ribû El Cezîre bi dawî bû.

PYD`ê li hola navenda xwe ya bajarê Qamişlo civînek bi dirûşma “20 sal têkoşîna me ya pêkanîna projeya neteweya demokratîk, azadiya jinan û Sûriyeyeke demokratîk berdewam e” lidar xist.

Endamên PYD`ê yên bajarê Qamişlo û bajarokên wê, endamên Meclisa Malbatên Şehîdan û şêniyên Qamişloyê jî beşdarî civînê bûn. Civîn bi deqeyeke rêzgirtin dest pê kir.

Endamê PYD`ê Silêman Abû Bekir axivî û 20`emîn salvegera partiyê li tevahî gelê aştîxwaz û li Rêber Abdullah Ocalan û malbatên şehîdan pîroz kir û da zanîn ku hêzên hegemonîk dixwazin civakake kole ji xwe re ava bikin. Her roj bi rêbazeke cuda xwestekên xwe tînin holê. Di hundirê Kurdistanê de rê li ber berxwedan û serhildanan gelan girtin.

Silêman Abû Bekir got: “Di sedsala 20`an de tevgereke siyasî bi pêşengiya Rêber Apo dest bi hişmendiyeke nû kir. Ev pêşengî jî ji lêkolînkirina ser rastiya gelê Kurd derket holê.”

Silêman Abû Bekir bal kişand ser dema damezrandina PYD`ê û diyar kir ku di dema vegera li kongreya damezrandinê de destê xiyanetê bi ser pêşengên partiyê hat û wiha pê de çû: “Hevala me Şîlan û 4 hevalên pê re şehîd xistin. Bi şehadetê asta tekoşîna me bilindtir bû. Di 2011`an de dema derketina aloziya Sûriyeyê PYD`ê ji nav hemû partiyan xwe pêşeng dît û ji Şoreşa Rojava re pêşengî kir.”

Civîn bi pêşandana senvîzyonekê der barê kar û xebatên PYD`ê bi dawî bû.

Li navçeya Tirbespiyê ya kantona Qamişlo PYD'ê şahiyeke girseyî li Akademiya Şehîd Yekta Herekor a rojavayê navçeyê li dar xist. Di şahiyê de şêniyên navçeyê û endamên partiyên siyasî û saziyên sivîl beşdar bûn.

Di serî de hevseroka PYD'ê ya navçeyê Hediye Şemo salvegera damezirandina partiyê li Rêber Abdullah Ocalan, hemû şehîdên azadiyê û şêniyan pîroz kir û got: "PYD'ê ji dema damezirandina xwe û şehîdbûna kadirên wê yên damezirîner de, bi partiya şehîdan tê naskirin."

Hediye Şemo soza şopandina rêya şehîdan û domandina berxwedanê li hember hemû êrişan heta pêkanîna armancên şoreşê da.

Piştre, koma şehîd Xebat a navenda Çand û Hunerê ya Hêzil stran pêşkêş kirin û şêniyan govend gerandin.

Di dawiya şahiyê de sînevîzyonek bi gotinên Rêber Abdullah Ocalan hat pêşandan.

Li navçeya Çilaxa ya kantona Qamişlo PYD'ê şahiyeke mezin li qada Geracê ya navenda navçeyê li dar xist, tê de bi dehan şênî, nûnerên partiyên siyasî û rûspiyên eşîrên navçeyê beşdar bûn.

Di serî de hevserokê PYD'ê ya navçeyê Sirûr El Şetî destnîşan kir ku PYD'ê di dema ku dewletên dagirker ên Kurdistanê komplo li dijî gelên herêmê amade dikirin de, hat damezirandin û li hember van planan rawestiya.

El Şetî soza domandina têkoşînê heta pêkanîna serkeftinê û rizgarkirina deverên dagirkirî da.

Her wiha, endama Kongra Star Nuzhe Hisên salvegera damezirandina PYD'ê li şêniyan pîroz kir û got: "Jin di damezirandina partiyê de pêşeng bûn û di siyasetê de roleke girîng lîst."

Şahî bi gerandina govendan li ber stranên koma Saz û Awaz a Qamişlo bi dawî bû.

Bi dehan şêniyên navçeya Til Birak, endamên saziyên sivîl û leşkerî û nûnerên partiyên siyasî beşdarî şahiya ku nivîsgeha PYD'ê li navenda Çand û Hunerê ya rojavayê navçeyê li dar xistiye, bûn.

Di serî de sînevîzyonek li ser dîroka PYD'ê hat pêşandan, piştre endamê nivîsgeha PYD'ê ya navçeyê Ebdurehîm Fatimî der barê dîroka partiyê axivî û keda gelên têkoşer û azadîxwaz silav kir.

Fatimî wiha domand: "Em bang li gelên azadîxwaz dikin ku xwe zêdetir bi rêxistin bikin û zextê li dewletên neteweperest bikin da ku azadiya xwe bi dest bixin."

Fatimî soza domandina têkoşînê heta pêkanîna armancên şehîdan nû kir.

Piştre peyamên pîrozbahiyê yên partiyên siyasî û Meclisa Malbatên Şehîdan a navçeyê hatin xwendin.

Li bajarê Dêrikê, PYD'ê şahiyek bi heman boneyê li parka Dîcle ya navenda bajêr li dar xist, tê de şêniyên navçeyê û saziyên sivîl beşdar bûn.

Di serî de bi navê PYD'ê Mihemed Seîd got: "Ji dema damezirandina partiyê de em parastina mafên hemû pêkhateyên Kurd, Ereb û Suryan û serhildana li hember siyasetên dijber û êrişên dagirkeriyê digirin ser milên xwe, me ji bo vê yekê jî bi hezaran şehîd dan. Em soz didin şehîdên xwe ku heta pêkanîna azadiyê rêya wan bişopînin."

Piştre, sînevîzyonek li ser dîroka PYD'ê hat pêşandan û şahî bi stranên koma Cûdî bi dawî bû.

(mh)

ANHA