Bi sedan şênî sersaxî dan malbata şehîd Necmedîn Feysel

Bi sedan şêniyên navçeya Amûdê û gundên wê tev li merasîma sersaxiyê ya şehîd Necmedîn Feysel bûn ku li gundê Cewheriye hatiye lidarxistin.

Endamê Meclisa Leşkerî ya Amûdê Seîd Ferso axivî û got: “Sûcên dewleta Tirk a dagirker ên bi serkêşiya Erdogan ên li dijî sivîlan, îsbat dike ku kiryarên terorîst in. Dewleta Tirk bi hedefgirtina kanala jinan, hewl dide ku rastiyê bitepsîne û tola DAIŞ`ê hilîne. Rastiya ku nûçegihan dixebitin ji bo ku ragihînin, ditepsîne.”

Hevserokê Meclisa Malbatên Şehîdan Zîwer Şêxo jî diyar kir ku hedefgirtina kadkerên Jin TV di çarçoveya têkbirina destkeftiyên şoreşa 19`ê Tîrmehê de tê.

Şêxo destnîşan kir ku jin li Rojava rolek di tevahî qadan de lîst ji têkoşîna li dijî terorê bigire het bigihêje aşkerakirina rastiyê û got ji ber wê jin tê hedefgirtin.

Seroka Desteya Jinan a Rêveberiya Xweseriya Demokratîk a herêma Cizîrê, Evîn Paşo axivî û got: “Rêya azadiyê rêyeke dijwar e û heta armanca pêwîst pêk were, divê têkoşîn berdewam bike.”

Evîn îşaret pê kir ku malbata şehîd Feysel rêya têkoşînê hilbijart û di wê oxirê de fedakarî kirin.

Endamê Rêveberiya Partiya Yekitiya Demokratîk (PYD) Adil Mela Emîn jî axivî û destnîşan kir ku Tirkiye hewl dide bi tevahî rêbazan pergala demokratîk a li herêmê têk bibe.

Her wiha Emîn got: “Berdewamkirina têkoşînê, dê bersiva herî guncew a êrişan be. Divê em rêya şehîdan li ser bingeha ramana Rêber Abdullah Ocalan berdewam bikin.”

Di encama êrişa balafireke bêmirov û biçek a dewleta Tirk a dagirker li dijî erebeyeke kanala Jin TV de karmendê kanalê Necmedîn Feysel şehîd bû û nûçegihana kanalê Delîla Egîd birîndar bû.

(şx)

ANHA