​​​​​​​′PDK di pişta Kurdan de xencerek e′

Li gorî bîlançoya HPG′ê, artêşa Tirk a dagirker di navbera 17, 18, 19 û 20′ê Tîrmehê de 519 caran Herêmên Parastinê yên Medyayê bi tank, top û cureyên çekên giran û qedexekirî kirin hedef. Di wan êrişan de PDK jî hevkar e.

Li hember wan êrişan û hevkariya PDK′ê gel bi hêrs e û rojane li Kurdistanê û ji hêla kurdistaniyên li cîhanê ve çalakî tên lidarxistin.

Têkildarî mijarê welatiya bi navê Emîne Mistefa ya ji Kobanê got êrişên li dijî Herêmên Parastinê yên Medyayê yên hemwextî bidawîbûna sedsaliya Peymana Lozanê ne tesaduf in û anî ziman ku ew temamkirina qirkirina Kurdan e ku di sedsaliya Lozanê de bi bin ketine. Lê civata navneteweyî jî li hember van êrişan bê deng e.

Emîne şerê HPG′ê li dijî artêşa Tirk a dagirker, li gorî gelê Kurdistanê bi şerê çarenûsê û şerê hebûnê bi nav kir û wiha domand: "Berxwedana HPG′ê li dijî Komploya Navneteweyî ya bi rêya dewleta Tirk nûnertiya parastina gelê Kurdistanê dike. Divê gelê Kurdistanê li dora HPG′ê bicive û piştgiriyê bide."

Welatiyê bi navê Xelîl Ehmed jî got êrişên berdewam temamkirina Peymana Lozanê ne û got artêşa Tirk a dagirker û PDK nikarin vîna gelê Kurd têk bibin, ji ber ku gel li dora gerîla civiyaye.

Ehmed bal kişand ser girîngiya hişyarî û bilindkirina têkoşîna di vê qonaxê de û wiha anî ziman: "Li pêş me derfeteke dîrokî heye. Têkçûnên dewleta Tirk a dagirker li ser destê hêzên gerîla dê bi xwe re serkeftinên mezin bîne. Ji bo ku ev yek pêk were, divê em têkoşînê bilind bikin û li pişt hêzên gerîla bisekinin û ji planên dijmin hişyar bin."

Ciwanê bi navê Mihemed Mihemed jî wiha got: “Careke din PDK′ê ji bo şerê li dijî kesên parastina Kurdan û gelên bindest dike, destê xwe kiriye destê dewleta Tirk a dagirker. Ev ne cara yekemîn e ku PDK dikeve xeta xiyanetê. Lê belê ji dema avabûna wê ve di pişta Kurdan de xencerek e."

Mihemed wiha domand: "Tişt PDK dike sûcekî din li qeyda wê ya reş zêde dike. Bêyî xema bandorên pêşerojê bixwe planên dewleta Tirk a dagirker pêk tîne. Bi rêya tevkariya wê bi dewleta Tirk a dagirker re di êrişên li dijî çiyayên Kurdistanê de aşkera dibe ku xema vê partiyê tenê berjewendiyên wê ye û ger li ser hesabê Kurdan be. Ji lew re divê Kurdên li Başûrê Kurdistanê serî li hember wê hildin."

′DIVÊ EM LI KÊLEKA HÊZÊN GERÎLA BISEKININ′

Welatiya bi navê Hemîde Derwêş soz da ku ew ê têkoşîn û berxwedanê bidomînin û got ew yek rêbaza yekane ya gelê Kurdistanê ye ku li hember dewleta Tirk bisekinin, destkeftî werin parastin û serkeftin pêk were.

(fr)

ANHA