Komîteya Şilêr êrişa zayendî ya li zaroka li Efrînê şermezar kir

Komîteya Şilêr êrişa zayendî ya çeteyên dewleta Tirk a li zarokeke 13 salî şermezar kir û diyar kir ku roj bi roj sûcên li dijî zarokan zêde dibin, lê rola saziyên mafên mirovan ên navneteweyî jî nayê dîtin.

2 tîrmeh, 2023 10:16

QAMIŞLO

Navenda Çavdêriya Mafên Mirovan a Sûriyeyê (SOHR) duh ragihand ku çeteyên ‘Hemzat’ ên dewleta Tirk a dagirker, li gundê Ciwêq ê Efrînê êrişeke zayendî li zarokeke 13 salî kiriye.

Der barê mijarê de Komîteya Şilêr a Şopandina Mafên Zarokan şaxên Qamişlo û Şehbayê daxuyaniyên cuda da.

Daxuyanî li Baxçeyê Xwendinê yê li Qamişloyê ji aliyê endama Rêveberiya Komîteya Şilêr a Şopandina Mafên Zarokan Jûlya Xelo ve hat xwendin.

Di daxuyaniyê de hat diyarkirin ku rojane daxuyanî têkildarî sûcên çeteyên dewleta Tirk a dagirker tên eşkerekirin, lê tu guhertinê li du xwe naynin.

Hate gotin, li herêmên dagirkirî sûc û kiryarên li dijî zarokan dewam dikin û rojane zarok tên qetilkirin û tecawiz li wan tê kirin.

Komîteyê bal kişand ser bûyera dawîn a tecawiza li zarokeke 13 salî û got: “Ev bûyer ne yekemîn e, rojane têne dubarekirin. Ji ber nedayîna derfetên derbasbûna çapemeniyê ji herêmên dagirkirî re, gelek mafên zarokan têne çewisandin ruxmî ku rojane komîteyên şopandin û parastina mafên mirovan ên navneteweyî têne avakirin lê heya niha tu encam derneketiye holê.”

Komîteya Şilêr bêdengiya rêxistinên mafên zarokan a li hemberî van sûcan jî şermezar kir û got: "Divê saziyên mafên mirovan ji bêdengiya xwe derkevin û li hemberî qetilkirin û tecawiza li zarokan helwesta xwe diyar bikin."

ŞEHBA

Komîteya Şilêr ya Şopandina Mafê Zarokan şaxê kantona Efrîn û Şehbay li Kampa Serdem a kantona Şehbayê daxuyaniyek da û bang li rêxistinên têkildarî kir ku li hember mîna van sûcan bêdeng nemînin.

Daxuyanî ji hêla endama Komîteya şilêr ya şopandina mafê zarokan İstervan Hiso ve hate xwedin .

İstervan di daxuyaniyê de bang li rêxistinên têkildar kir û wiha got: "Em bêdengiya we ya li hember mafê zarokan têne kirin lanet û şermezar dikin, bangewaziya me ji hemû kesên ku mafên mirovan û zarokan diparêzin, ji bêdengiya xwe derkevin û li hember van kuştin û tecawîzkirina zarokan helwesta xwe diyar bikin."

(sb-zş/bb)

ANHA