'Em bi têkoşînê dawî li dagirkeriyê bînin'

Şêniyên navçeya Til Koçer a girêdayî kantona Qamişlo êrişên dewleta Tirk a dagirker ên li herêmên Bakur û Rojhilatê Sûriyeyê şermezar kirin û destnîşan kirin ku ew ê heta dawîanîna li dagirkeriyê têkoşînê bilind bikin.

NÛÇE

25 hezîran, 2023 11:32

QAMIŞLO

Kongra Star bi dirûşmeya “Birêxistinbûna jinan bersiva êrişên dagirkeriyê ye” li navçeya Til Koçer meşek li dar xist. Bi sedan şêniyên navçeyê, endamên sazî û meclisan, rûspiyên eşîrên herêmê beşdarî meşê bûn.

Meşê ji pêşiya Parka Rêber Abdullah Ocalan a li navçeyê dest pê kir. Tê de dirûşmeyên silavkirina berxwedanê û dilsoziya bi şehîdan re hatin qêrîn û wêneyên şehîdên komkujiya dewleta Tirk a dagirker a 20`ê Hezîranê hatin bilindkirin.

Meş li sûka navçeyê veguherî mîtîngê. Li wir, piştî rêzgirtinê endama Kongra Star a Til Koçerê Emel Icêl axivî û êriş şermezar kirin.

Emel destnîşan kir ku jinên pêşeng ên ku di doza rizgariya jinan de têdikoşin tên hedefgirtin û got: “Armanc dikin ku di şexsê wan jinan de îradeya tevahî jinan bişikînin.”

Emel anî ziman ku ew ê rêya hevrêyên xwe bişopînin û dê ji bo bidawîkirina dagirkeriyê têkoşînê mezin bikin. Emel banga hevgirtin û yekitiyê li hember êrişan kir.

Meş bi dirûşmeyên mîna “Bijî Berxwedana Gelan” bi dawî bû.

(c)

ANHA