'Bi yekrêzî û hevgirtinê em ê li dijî polîtîkayên Erdogan bisekinin'

Welatiya bi navê Rîm Derwîş a ji Minbicê wiha behsa êrişan kir: “Piştî serketina Erdogan di hilbijartinan de, tişta beriya hilbijartinan dest pê kiribûn, niha temam dike. Xema wî ya yekane, têkbirina ewlehiya herêmê û koçberkirina niştecihên wê ye da ku bi hêsanî herêmê kontrol bike.”

Rîm diyar kir ku Erdogan bêdengiya hêzên navneteweyî li hember van sûcan, bi kar tîne da ku berjewendiyên xwe pêk bîne, herêmê parçebike û şerê tê de berdewam bibe.

Êrişên artêşa Tirk a dagirker û çeteyên wê yên li dijî Bakur û Rojhilatê Sûriyeyê didomin. Di encamê de gelek welatî û şervanên hêzên leşkerî yên ku herêmê diparêzin şehîd û birîndar bûn. Ji wan di hefteya borî de 6 şervanên Meclisa Leşkerî ya Minbicê şehîd bûn. Her wiha Hevseroka Meclisa Kantona Qamişlo, cîgira hevseroketiya meclisê û endamê meclisê di 20'ê Hezîranê de şehîd bûn. Li hember van êrişan şêniyên herêmê bi rêya xwepêşandan û çalakiyan nerazîbûna xwe nîşan da.

Rîm bang li rêxistinên mafên mirovna kir ku binpêkirinên dewleta Tirk a dagirker ên li dijî zarok, jin û temenmezinên herêmê rawestînin û got: "Em daxwaza girtina qada hewayî ya hemû herêmên xwe dikin."

Rîm wiha domand: "Em li Bakur û Rojhilatê Sûriyeyê bi hemû pêkhateyên xwe li kêleka hêzên xwe yên leşkerî ne da ku em plan û xewnên Erdogan têk bibin. Me ji bo azadiyê cegerên xwe feda kirin û em dê xaka xwe ya ku bi xwîna şehîdan avdan heta dawiyê biparêzin."

'HER ÇIQAS ÊRIŞ ZÊDE BIBIN EM DÊ PIŞTGIRIYÊ BIDIN HÊZÊN XWE Û BERXWEDANA XWE`

Di heman çarçoveyê de, welatiya bi navê Fatme Mihemed êrişên dewleta Tirk a dagirker şermezar kirin û got: "Ji gelek rojan ve dewleta Tirk a dagirker bi balafirên xwe yên bêmirov li dijî gundên başûr û rojhilatê Minbicê êrişan pêk tîne û bi awayekî rasterast sivîlan hedef digire. Di encamê de jî gelek welatî birîndar bûn û dema ku 6 şervanên Meclisa Leşkerî ya Minbicê diçûn hawara birîndaran ew ji aliyê balafira bêmirov ve hatin hedefgirtin û di encamê de ew şehîd bûn."

Fatme Mihemed destnîşan kir ku dewleta Tirk a dagirker û çeteyên wê naxwazin rewşeke aram li Bakur û Rojhilatê Sûriyeyê peyda bibe û got: "Ji dema rizgarkirina Bakur û Rojhilatê Sûriyeyê ji çeteyên DAIŞ'ê, dewleta Tirk a dagirker êrişên xwe yên li dijî gelê herêmê bênavber didomîne da ku îradeya gelên azad û aramiya herêmê têk bibe."

Fatme Mihemed piştrast kir ku ew ê piştgiriyê bidin hêzên Meclisa Leşkerî ya Minbicê û dê tevî êrişan jî berxwedana xwe bidomînin û asta wê bilind bikin.

'BALAFIRÊN DIJMIN ME NATIRSÎNIN'

Her wiha, welatiyê bi navê Şêxo Bîlal wiha axivî: "Ev êrişeke hovane ye û şêniyan hedef digire, ji dema rizgarkirina herêmê ji DAIŞ'ê de ev êriş ranewestiyane. Dewleta Tirk a dagirker hewl dide gelên azadîxwaz tune bike û Osmaniyê vejîne."

Şêxo der barê paşguhkirina rewşa gel de ji aliyê rêxistinên mafên mirovan ve got: "Eger rêxistinên mafên mirovan di rastiyê de hene ew ê van êriş û binpêkirinên dewleta Tirk a dagirker ên li dijî xaka Sûriyeyê rawestînin."

Şêxo destnîşan kir ku balafirên dewleta Tirk a dagirker dê nikarin îradeya gel têk bibin û ew dê her piştgiriyê bidin hêzên xwe yên leşkerî.

Şêxo di dawiya axaftina xwe de got: "Em dê li hember komployên hovane yên ku Erdogan wan plan dike, xwe bikin mertal û em dê di xendeqekê de li kêleka hêzên xwe yên leşkerî bin û em dê bi îrade û berxwedana xwe hemû deverên dagirkirî rizgar bikin û dagirkeriya Tirk têk bibin."

(mh/şx)

ANHA