Cotkarên Reqayê fatoreyên genim wergirtin

Nivîsgeha Darayî û Pereyan a Navendî ya Reqayê duh ragihand ku dê dest bi radestkirina fatoreyên genim ji cotkaran re ku genimê xwe di 24-29′ê Gulanê de radest kirine, bike.

Li gorî wê, bi sedan cotkarên Reqayê berê xwe da Nivîsgeha Darayî û Pereyan a Reqayê da ku fatoreyên xwe wergirin.

Rayedarê Nivîsgeha Darayî û Pereyan a Navendî ya Reqayê Macid El Elî li ser mijarê wiha got: “Me îro (20′ê Hezîranê) li gorî tabloya me duh li ser rûpela xwe ya fermî belav kiriye, dest bi radestkirina fatoreyên genim ji cotkaran re kir.”

El Elî wiha domand: “Di çend rojên bê de dê nav û tabloya belavkirinê li herêmên din jî were ragihandin da ku li gorî bihayê 43 sentan a Rêveberiya Xweser diyar kiriye, fatoreyên xwe wergirin.”

Di nivîsgehê de 5 sendoqên radestkirina fatoreyan hene. Cotkar kaxiza qabanê (pîvanê), nasnameya xwe dixe van sendoqan, da ku fatoreya xwe ya genim li gorî dolar wergire.

Li ser radestkirinê, cotkar Hemod El Muhsin ê ji rojhilatê Reqayê ji ajansa me re wiha got: "Min ji roja destpêkê ve genim teslîm kir û îro jî ji bo wergirtina fatoreyê hatime. Biha pir baş e û kalîteya genim li gorî pileyan jî baş e. Min îro fatoreya xwe bi hêsanî wergirt û tu pirsgirêk di radestkirina fatoreyê de derneketin. Pergala radestkirina fatoreyan nû ye û pir baş e."

Li herêmên Bakur û Rojhilatê Sûriyeyê 8 navendên radestkirina fatoreyên genim hene; Reqa, Minbic, Tebqa, Dêrazor, Kobanê, Hesekê, Qamişlo û Dêrikê.

Çaverê ye ku navendên din jî di çend rojên bê de fatoreyên genim radest bikin.

(fr)

ANHA