94 şehîd li Qamişlo hate bibîranîn

Meclisa Malbatên Şehîdan a Qamişlo ji bo bîranîna 94 şehîdên meha Hezîranê ku di dem û cihên cuda de şehîd bûne, merasîmek li dar xist.

Endamên Meclisa Malbatên Şehîdan, Partiya Yekitiya Demokratîk (PYD), Tevgera Civaka Demokratîk (TEV-DEM), endamên Kongra Star, Tevgera Ciwanên Şoreşger a Sûriyeyê û Yekitiya Jinên Ciwan, Saziyên Civaka Sivîl û malbatên şehîdan tev li merasîmê bûn.

Di merasîmê de bi navê Meclisa Giştî ya PYD`ê Perwîn Yusif axivî û fedakariyên şehîdan silav kir ku di oxira vê axê û peydakirina jiyaneke birûmet de, kirine.

Perwîn diyar kir ku tevî siyasetên çewisandinê yên li dijî gelên herêmê pêk tên lê ew bi axa xwe ve girêdayî ne û got: “Bi yekitî û berxwedana xwe em dê ala têkoşînê bilind rakin û azadiyê bi dest bixin.”

Her wiha Perwîn soza şopandina rêya şehîdan heta rizgarkirina xaka dagirkirî û bidestxistina azadiya fîzîkî ya Rêber Abdullah Ocalan, da.

Di dawiya merasîmê de, endama Komîteya Jinan a Meclisa Malbatên Şehîdan Ayde Xelîl wesîqeyên şehadeta şehîdan xwendin.

(şx)

ANHA