Li Amûdê bîranîna 25 şehîdan

Meclisa Malbatên Şehîdan a Navçeya Amûdê ya girêdayî kantona Qamişloyê, 25 şehîdên HPG, YPG/YPJ′ê û Hêzên Ewlekariya Hundirîn ku di dem û cihên cuda yên di meha Gulanê de şehîd bûbûn, li Goristana Şehîd Îsmaîl a Amûdê bi bîr anîn.

Di merasîma bibîranînê de malbatên şehîdan,  xelkê navçeyê û gundewarên wê, endamên saziyên civaka sivîl, PYD, Kongra Star û nûnerên saziyên leşkerî beşdar bûn.

Hevserokê Meclisa Malbatên Şehîdan a Amûdê Zîwer Silêman axivî û bal kişand ser nirxên şehadetê û şehîdan, fedekarî û rola wan di parastina ewlehî û îstîqrara Bakur û Rojhilatê Sûriyeyê de.

Silêman got: "Pênasekirina şehîdan û têkoşîna wan bi gotinan nayê îfadekirin. Divê em li ser şopa wan bimeşin û destkeftiyên wan bi rêya biratiya gelan ku Rêber Abdullah Ocalan ji gelên Mezopotamya û Rojhilata Navîn re pêşkêş kiriye, biparêzin."

Zîwer Silêman soz da hemû beşdaran ku ew ê heta pêkanîna azadiya fîzîkî ya Rêber Abdullah Ocalan û azadiya gelê herêmê têkoşînê bilind bikin.

Piştî axaftinê, endama Meclisa Malbatên Şehîdan Arîn Xelef wesîqeyên 25 şehîdan xwendin.

Merasîm bi diruşmên mîna “Şehîd Namirinî” û tilîliyên dayikan bi dawî bû.

(fr/c)

ANHA