​​​​​​​Şêniyên Minbicê: Azadiya Rêber Abdullah Ocalan azadiya tevahiya gelên Rojhilata Navîn e

Bertekên li hember tecrîda li ser Rêber Abdullah Ocalan li Bakur û Rojhilatê Sûriyeyê zêde dibin.

Têkildarî mijarê şêniyên Minbicê teqezî bi destxistina azadiya fîzîkî ya Rêber Abdullah Ocalan kir. Şêniyê bi navê Munîr El Ewed got: “Komplo li dijî rêber û ronakbîrê navneteweyî Abdullah Ocalan ji aliyê dewletên mêtînger ve di serî dewleta Tirk a dagirker li dar ket. Wan armanc kir ku gelên Rojhilata Navîn parçe bikin.”

El Ewed wiha domand: “Fikrê Rêber Abdullah Ocalan, navneteweyî ye, biratiya gelan û jiyana hevbeş bingeha wê ye. Armanca wan dewletan a yekemîn û dawîn, têkbirina vî fikrî ye. Lê bi tecrîdkirina Rêbertî nikarin bigihêjin armanca xwe ji ber ku ew li seranserî cîhanê belav bûye.”

El Ewed destnîşan kir ku dê rêya neteweya demokratîk a Rêber Abdullah Ocalan bi domînin, azadiya wî ya fîzîkî bi dest bixin û fikrê wî di nava cîhanê de belav bikin.

Welatiya bi navê Buseyne El Hesen got: “Dewletên kapîtalîst di serî de dewleta Tirk a dagirker tecrîdeke giran li Rêber Abdullah Ocalan ferz dike û bi vê kiryarê re qanûn û peymanên navneteweyî binpê dike. Lê dê berxwedana me berdewam bike heta ku azadiya fîzîkî ya Rêber Abdulllah Ocalan bi dest bixin. Em dev ji projeya neteweya demokratîk jî bernadin.”

Welatiyê bi navê Fewaz El Hemîdî jî destnîşan kir ku dewletên kapîtalîst ên sponserên terorê û mêtingeriyê, ji tecrîdê armanc dikin nakokî û aloziya li Rojhilata Navîn belav bikin.

El Hemîdî banga bidawîkirina tecrîdê û pêkanîna azadiya fîzîkî ya Rêber Abdullah Ocalan kir, ji ber ku li gorî wî, azadiya Rêber Abdullah Ocalan, azadiya gelan e.

(dm/şx)

ANHA