Şêniyên Şêrawa Roja Zimanê Kurdî pîroz kir

Bi sedan endamên Komîteya Perwerdeya Civaka Demokratîk (KPC-D) û şêniyên navçeya Şêrawa li qada Kampa Veger a gundê Ziyaretê yê navçeya Şêrawa ya kantona Efrîna dagirkirî kom bûn.

Qad bi wêneyên Rêber Abdullah Ocalan û pankartên bi zimanên Erebî û Kurdî ku li ser "Zimanê me rûmeta me ye" û "Bê ziman jiyan nabe" û "Zimanê me hebûna me ye", hat xemilandin.

Di serî de endamê Meclisa Navçeya Şêrawa Henîf Seydo Roja Zimanê Kurdî li tevahiya gelê Kurd û şêniyên berxwedêr ên li kamp û malên nîvwêranbûyî dimînin û li Rêber Abdullah Ocalan pîroz kir.

Seydo wiha axivî: “Ji holêrakirina zimanê Kurdî, armanca tevahî dîktatoran bûn ku Kurdistan dagir kirin. Îro jî, bi rêya ferzkirina zimanê Tirkî li Efrîna kurdî û şerê taybet, planên wan didomin û teşwîqkirina zarokan ku erebî bixwînin, planên wan didomin."

Seydo di dawiya axaftina xwe de teqezî bi girîngiya parastina zimanê zikmakî ji planên dijmin kir.

Piştre Koma Şehîd Zîlan û hunermend Oryana Mihemed stranên şoreşgerî gotin û girseya beşdar li ber stranan xelekên govend gerandin.

Tê payîn ku bi heman boneyê rêzeçalakî li navçeya Til Rifet, Kampa Serdem û Kampa Berxwedan di hefteya bê de bên lidarixstin.

(mh/şx)

ANHA