Şêniyên Efrîn, Şehba û Helebê banga azadiya fîzîkî ya Rêber Abdullah Ocalan kir

Bi hezaran koçberên Efrîn, şêniyên Şehba û Helebê bi dirûşma "Azadiya Rêber Abdullah Ocalan, azadî û aştiya herêmê misoger dike" meşek girsayî li dar xistin û banga azadiya fîzîkî ya Rêber Abdullah Ocalan û piştgiriya Partiya Çepên Kesk di hilbijartinan de, kirin.

Bi hezaran şêniyên taxa Şêxmeqsûd û Eşrefiyê li cihê çalakiyê ku li gundê Eloşe yê navçeya Ehdasê ye  kom bûn..

Beşdaran tecrîda li ser Rêber Abdullah Ocalan şermezar kir û diyar kirin ku divê asta têkoşînê bilind bikin heta ku azadiya fîzîkî ya Rêber Abdullah Ocalan bi dest bixin..

Beşdaran guhdarî qeydên dengê  Rêber Abdullah Ocalan kirin ku tê de Rêber Abdullah Ocalan behsa sîstema desthilatdariya li Rojhilata Navîn, siyasetên ku dewleta li dijî gelan dimeşîne, zilmê li dijî jinan û sîstema demokratîk ku divê were pêkanîn da ku azadiya gelên Rojhilata Navîn bi dest bixin, dike.

Endama Partiya Yekitiya Demokratîk (PYD), Zelal Ceger bal kişand ser siyasetên ku li dijî herêmên tên meşandin bi taybet siyasetên dewleta Tirk li dijî Sûriyê û got; : "Divê gelê Kurd ê Bakurê Kurdistanê û Tirkiyê di hilbijartinên 14'ê Gulanê de dengê xwe bidin Partiya Çepên Kesk. Divê asta têkoşîna xwe li hember dagirkerî û sûcên wê li dijî şêniyên Efrîn û Bakur û Rojhilatê Sûriyê bilind bikin."

Endamê Meclisa Rûspiyên eşîrên kantona Efrîn û Şehbayê Mihemed Xeşan destnîşan kir ku yekitî û biratiya gelên herêmê bi hemû pêkhateyên xwe, girêdana wan a projeya netewa demokratîk û Rêveberiya Xweser ve girîng e. Her wiha da zanîn lu rizgarkirina herêmên dagirkirî û taybet Efrîn, Serêkaniyê û Girê Spî girîng e.

Koma Çiya Kurmênc a tevgera Çand û Huner, koma şehîd Hêva ya girêdayî Tevgera Kevana Zêrîn hin stranên şoreşgerî û filoklorî pêşandan.

(dm/şx)

ANHA