ʹBêdengiya li hemberî êrişan nîşaneya hevkariyê yeʹ

Dewleta Tirk a dagirker di 25ʹê Nîsana 2017ʹan de çiyayê Qereçoxê bombebaran kir. Di encamê de 20 şervanên YPG û YPJʹê şehîd bûn. Ev êrişa hawayî ya yekemîn bû ku dewleta Tirk li dijî Bakur û Rojhilatê Sûriyeyê pêk anî. Rêveberiya Xweser a Bakur û Rojhilatê Sûriyeyê 25ʹê Nîsanê wekî Roja Şehîdan îlan kir.

Di salvegera 6ʹemîn a komkujiya li Qereçoxê (Îro) de dewleta Tirk a dagirker li Kobanê bi dronekê erebeyek kir hedef. Di encamê de şervanekî QSDʹê şehîd bû.

Welatiyê bi navê Xanim Fadil anî ziman ku dîroka dewleta Tirk a dagirker a qirkirina gelan dirêj e û got: "Êrişa li ser Qereçoxê ya destpêkê bû. Armanc jê şikandina îradeya gelan û hedefgirtina projeya me ya demokratîk bû."

Welatiyê bi navê Hesen Seyîd Şakir jî destnîşan kir ku êrişa li Qereçoxê ya destpêkê bû û êrişên bi balafirên hîna dewam dike. Şakir diyar kir ku ev êriş rakirina tola DAIŞʹê bû û temamkirina siyasetên qirkirina gelên herêmê bû.

Welatiyê bi navê Hesen Hesen anî ziman ku dewleta Tirk a dagirker dijî mirovahiyê ye û li cem wê sînor ji qetilkirin û kuştinê re tune ye. Her wiha got, dewleta Tirk êrişên li ser kesên ku şerê DAIŞʹê kirine, didomîne.

Hesen da zanîn ku Dewletên Yekbûyî yên Amerîkayê û Rûsya berpirsên êrişên dewleta Tirk a dagirker in û wiha domand: "Amerîka û Rûsya qada hewayî li ber Tirkiyeyê vekirin da ku sûcan li dijî herêmê pêk bînin. Ji ber vê yekê hevkarên dewleta Tirk in."

Welatiya bi navê Emîra Ebdo jî got, 25ʹê Nîsanê ji bo gelê Bakur û Rojhilatê Sûriyeyê rojeke watedar e û wiha domand: "Li ser vê xakê xwîna şehîdên ji hemû pêkhateyan tev li hev bûye. Di vê roja pîroz de em soz didin ku berdêl çi dibin bila bibin û êriş çiqasî dijwar bin em ê têkoşînê geş bikin."

(bb)

ANHA