Hikumeta Şamê dîsa rê neda ku alîkarî bigihêjin mexdûran

Ev roja duyemîn e ku alîkariyên xelkê Kobanê û Rêveberiya Xweser a herêma Firatê ji bo mexdûrên erdheja 6`ê Sibatê kom kiribûn, li deriyê Tayihe yê di navbera herêmên Rêveberiya Xweser û herêmên hikumeta Şamê de tên rawestandin û hîna destûra derbasbûnê nehatiye dayîn.

Alîkariyên ji du kamyonan pêk tên, ku xelkê Kobanê û gundên wê ji bo mexdûrên erdhejê yên li Heleb û Şehbayê di çarçoveya kampanyaya alîkariyê ya Rêveberiya Xweser a Bakur û Rojhilatê Sûriyeyê de kom kiribûn, duh ber bi deriyê Tayihe ve hatibûn birêkirin.

Beriya şandina alîkariyan ber bi deriyê Tayihe ve, Hevseroka Desteya Kar û Barên Civakî ya Rêveberiya Xweser a herêma Firatê Hêlîn Hacim daxuyandibû ku piştî wan erêkirina derbasbûnê wergirtiye, karwanê alîkariyan hatiye şandin.

Hikumeta Şamê beriya niha jî alîkariyên mirovî yên xelkê Silêmaniyê û 100 sehrîcên sotemeniyê yên ku Rêveberiya Xweser ji bo mexdûran şandibûn, asteng kirin.

Di 14`ê Adarê de, Rêveberiya Xweser a Bakur û Rojhilatê Sûriyeyê alîkariyên ku hikumeta Şamê destûra derbasbûna wan ber bi Helebê ve nedabû, paşde kişandin.

(cx)

ANHA