Cenazeyê şehîd Horan El Ebid bi merasîmekê hat veşartin

Şervanê Hêzên Sûriya Demokratîk (QSD) Horan Ferec El Ebid (Seyf Ebû Ferec) di şerên berê de birîndar bibû û duh (4ʹê Adarê) ji ber nexweşiyê şehîd bû.

Cenazeyê Seyf Ebû Ferec bi tevlêbûna endamên Meclisa Malbatên Şehîdan, Meclisa Leşkerî ya Minbicê û Meclisa Leşkerî ya Jinan, Rêveberiya Sivîl a Demokratîk a Minbicê, nûnerên partiyan, saziyên taybet ên jinan, rûspiyên êlên bajêr û Saziya Gaziyan hat veşartin.

Kerwanê şehîd ji pêşiya nexweşxaneya Firat ber bi Goristana Şehîdan ket rê. Li goristanê şervanên Meclisa Leşkerî ya Minbicê toreneke leşkerî li dar xist. Piştre endamê Saziya Gaziyan Mihemed Xeyr El Casim axivî û got, yên digihêjin şehadetê, ji bo gel û welatê xwe dibin sembol.

El Casim di dawiyê de soza şopandina rêya şehîdan heta pêkanîna armancên wan da.

Endamê Meclisa Malbatên Şehîdan a Minbicê Ela El Elî axivî û destnîşan kir ku ji bo ku ewlehî li welat pêk were şehîdan canê xwe feda kir.

Her wiha hevserokê Desteya Kar û Barên Civakî û Xebitandinê ya Bakur û Rojhilatê Sûriyê Farûq El Maşî axivî û goristana şehîdan bi muzayîk û gulîstanekê wesifand.

Di dawiya merasîmê de endamê Meclisa Malbatên Şehîdan Mihemed El Hisên wesîqeya şehadetê ya şehîd El Ebid xwend û radestî malbata wî kir. Dûre cenazeyê şehîd bi berzkirina dirûşma “Şehîd namir in” hate veşartin.

(şx)

ANHA