Bi boneya Roja Zimanê Dayikê çalakiyeke çandî bi zimanê suryanî

Bi nêzbûna Roja Zimanê Dayikê ya Cîhanê re ku dikeve 21′ê Sibatê, Saziya Olif Taw a Zimanê Suryanî çalakiyeke çandî û wêjeyî bi dirûşma "Yên ku zimanê xwe winda dikin hebûna xwe jî winda dikin" li navenda saziyê ya li Qamişloyê li dar xist.

Nûnerên Desteya Perwerde û Fêrkirinê ya Rêveberiya Xweser a Herêma Cizîrê, saziyên Suryanan û Meclisa Qamişloyê beşdarî çalakiyê bûn.

Di çalakiyê de helbestvanê Suryan Michael Hanna Philo helbest bi zimanê suryanî xwendin û stran hatin pêşkêşkirin. Dûre sînevîzyonek li ser zimanê suryanî û astengiyên li pêşberî pêkhateya Suryan hate pêşandan.

Endama rêveber a Saziya Olif Taw Çaklîn Ilyas Selîba li ser mijarê axivî û wiha got: "Ziman ji hêmanên jiyan û fikra mirov in. Ne pêkan e zimanek zindî be û bi pêş bikeve, ger ew gel zimanê xwe yê dayikê bi kar neyne."

Çaklîn wiha dawî li gotina xwe anî: "Em li hember astengiyên xeternak in. Divê em nasname, hebûn û zimanê xwe biparêzin. Berpirsyarî li ser me tevan e, bi taybet li ser saziyên civakî, çandî û partiyên siyasî ye. Divê stratejî werin aktîfkirin û desteka guncaw ji bo parastina ziman ji têkçûnê were peydakirin û xebatên pêxistina wê bên kirin."

(fr)

ANHA