Şandeya Rêveberiya Xweser rewşa mexdûrên erdhejê şopand

Şande ji Hevseroka Meclisa Rêveber a Rêveberiya Xweser a Bakur û Rojhilatê Sûriyeyê Bêrîvn Xalid, cîgirê Hevserokatiya Meclisa Rêveber a Rêveberiya Xweser Hemdan El Ebid û Hevserokê TEV-DEMʹê Xerîb Hiso pêk dihat. Şandeyê serdana mexdûrên erdhejê yên ji taxên Şêxmeqsûd û Eşrefiyê yên li kampên Serdem û Berxwedan ên Şehbayê kir.

Şandeyê berî da konê sersaxiyê û ji malbatên qurbaniyên erdhejê yên ji navçeya Cindirêsê ya Efrînê re xwest.

Hevseroka Meclisa Rêveber a Rêveberiya Xweser a Bakur û Rojhilatê Sûriyê Bêrîvan Xalid daxuyanî xwend.

Di daxuyaniyê de banga tevlêbûna kampanyayê alîkariyê hate kirin ku Rêveberiya Xweser û Heyva Sor a Kurd ragihandiye.

Her wiha banga vekirina hemû deriyên sînor hate kirin û hate gotin ku divê nakokiyên siyasî ji mijarên mirovî were dûrxistin.

Hevserokê Meclisa Herêma Efrînê Bekir Elo jî spasiya şandeyê kir ku piştgîr dide koçberên li kampan û mexdûrên erdhejê.

Cîgirê Hevserokatiya Meclisa Rêveber a Rêveberiya Xweser Hemdan El Ebid di bin konê taziyê de, sersaxî ji malbatên qurbaniyên erdhejê yên ji xelkê navçeya Cindirêsê re xwest û ji birîndaran re şîfaya lezgîn xwest.

Hemdan El Ebid bang li hêzên navneteweyî kir ku mijarên mirovî polîtîze nekin û xwest ku alîkariyên ji bo herêmên bakur û bakurê rojavayê Sûriyeyê bi taybet ên herêmên dagirkirî neyên astengkirin.

El Ebid, bêdengiya Neteweyên Yekbûyî, Komkara Ereban û rêxistinên navneteweyî û civaka sivîl a li hemberî erdhejê, neşandina tîmên rizgariyê ji bo herêmên wêrankirî şermezar kir.

Hemdan El Ebid anî ziman ku hêzên navneteweyî vetoya Rûsya û Çînê esas digire û ji bo razîkirina Erdogan hemû deriyên sînor ên bi herêmên Rêveberiya Xweser re digirin.

Tê payîn ku şande serdana taxên Şêxmeqsûd û Eşrefiyê yên Helebê jî bike.

(bb)

ANHA