​​​​​​​Delegeyên Konferansa Jinên Ciwan: Tecrîd li dijî gelê Kurd û hemû jinan e

Konferansa Yekitiya Jinên Ciwan a Sêyemîn a Herêma Cizîrê duh li Navenda Çand û Hunerê ya Mihemed Şêxo ya Qamişloyê hat lidarxistin.

500 delege, endamên Kongra Star, HPC-Jin, Hêzên Ewlekariya Hundirîn-Jin, YPJ, Desteya Hundirîn a Herêma Cizîrê, Federasyona Gaziyan a Bakur û Rojhilatê Sûriyê, PYD û Meclisa Malbatên Şehîdan beşdarî konferansê bûn.

Delegeyên ku beşdarî konferansê bûn, ji ANHA’yê re nêrînên xwe parve kirin.

Nûra Hesen ku ji bajarê Dirbesiyê beşdarî konferansê bû, da zanîn ku di konferansê de gelek xalên girîng ên li ser têkoşîna jinên ciwan û birêxistinkirina Yekitiya Jinên Ciwan hatin nirxandin. Nûra wiha berdewam kir: “Konferansa me di demeke pir girîng de çêbû. Em nêzî 15’ê Sibatê dibin. Ji ber vê em ê bi vê biryardariyê tev bigerin.”

Can Silo jî got: “Mijarên ku herî zêde em girîngiyê pê bidin, tecrîda girankirî ya li ser rêber Apo ye. Di heman demê em wek jinên ciwan di nava şer ê gel şoreşgerî de cihê xwe digirin ji bo ku em destkeftiyên xwe biparêzin.”

Endama Yekitiya Jinên Ciwan Hena Hesen jî bal kişand ser tecrîda girankirî ya li ser rêber Abdullah Ocalan û wiha axivî: “Tecrîd ne tenê li ser rêber Apo tê meşandin, di şexsê rêber Apo de li ser tevahiya Kurdan û jinan tê meşandin. Em tecrîdê şermezar dikin û heta ku em bi fizikî Rêberê xwe azad nekin em ê her di qadan bin.”

ANHA