Şêniyên Herêma Efrînê cenazeyê şehîd Şêrhat oxir kir

Şehîd Mihemed Seydo (Şêrhat Efrîn) di qonaxa duyemîn a Berxwedana Serdemê de û di roja salvegera 5'emîn a destpêka êrişên dewleta Tirk a dagirker ên li dijî Efrînê de şehîd bû.

Di merasîmê de bi sedan koçberên Efrînê û şêniyên kantonê beşdar bûn. Şênî li pêşiya nexweşxaneya Avrîn kom bûn û piştre berê xwe dan Goristana Şehîdan a Berxwedana Serdemê ya navçeya Ehresê.

Li wir, endamê Meclisa Malbatên Şehîdan Ebdulhenan Mamo sersaxî ji malbata şehîd û hemû malbatên şehîdan re xwest.

Mamo got: "Di salvegera 5'emîn a destpêka êrişên li dijî Efrînê de, dewleta Tirk a dagirker xwest hovîtiya xwe bi rêya topbarankirina kantona Şehbayê û têkbirina îradeya koçberên Efrînê yên li kantonê, nîşan bide."

Her wiha, endama Kongra Star Zozan Hec Xelîl wiha axivî: "Gelê me yê li Şehbayê gelekî berxwedêr e û îradeya xwe ji fikrê rêber Abdullah Ocalan werdigire."

Piştre, wesîqeya şehadeta şehîd hat xwendin û radestî malbata wî hat kirin.

Piştî xwendina wesîqeyê pismamê şehîd Kendal Efrîn bi navê malbata wî wiha axivî: “Divê koçberên Efrînê ji siyaset û şerê taybet ên dewleta Tirk a dagirker netirsin, em ê hemû plananên li dijî me têk bibin.”

Kendal Efrîn soza domandina têkoşîn û berxwedanê heta pêkanîna serkeftinê da.

Di dawiya merasîmê de cenazeyê şehîd di nava tilîliyên dayikan û berzkirina siloganên "Şehîd Namirin" de hat oxirkirin.

 (mh)

ANHA