​​​​​​​Li Helebê encamên êrişên dewleta Tirk hatin nirxandin

Di çarçoveya redkirina êrişên dewleta Tirk a dagirker û gotubêjkirina bandorên wê li ser rewşa Sûriyê de, Meclisa Sûriya Demokratîk (MSD) komxebatek bi dirûma “Êriş û mudaxeleyên pergala Tirkiyê û bandorên wê li ser aloziyê û çarseriya li Sûriyê” li dar xist.

Komxebat li hola civînan a MSD`ê ya li rojhilatê taxa Şêxmeqsûd a Helebê bi beşdariya bi dehan nûnerên partiyan û saziyên sivîl li dar ket.

Di komxebatê de, hevserokê MSD`ê ya Helebê Cîhan Mihemed mijarên komxebatê eşkere kirin. Cîhan got: “Bi destpêkirina aloziya Sûriyê re sala 2011`an, hêz û ajandeyên herêmî û derve destwerdana welêt kir da ku hesabên navneteweyî û herêmî tesfiye bikin û ewlehiya herêmê têk bibin.”

BENDÊN KU LI PÊŞIYA FIKR Û FÎLEBAZIYA REJÎMA TIRK DIGIRIN

Ji bo dîtina însiyatîfên çalak û balkêş ku rê li pêşiya fikr û fîlebaziya rejîma Tirk digirin, piştgiriyê dide nêrîn û rêgezên niştimanî yên projeya demokratîk Cîhan gelek bend pêşniyar kirin. Jê yên herî girîng;

Destekdayîna ragihandina sûrî, ji bo eşkerekirina projeya osmanî ku dewleta Tirk a dagirker dixwaze bi rêya Mîsaqê Millî pêk bîne.

Girîngiyê bidin hebûneke niştimanî ya rasteqîn û demokrat a sûrî ku nêrîn û hêviyên sûriyan hemêz dike.

Lidarxistina diyaloga sûrî-sûrî di bin banê rêgezên niştimanî yên pêkhateyên civaka Sûriyê de ku MSD`ê banga wê dike.

JI BO XILASKIRINA WELÊT JI ŞER DERKETINA MSD`Ê PÊWÎSTIYEK BÛ

Piştre nûnerê Partiya Yekitiya Demokrat a Kurd li Sûriyê Mihemed Heyder nêrîna xwe parve kir û destpêkê salvegera 7`an a damezirandina MSD`ê pîroz kir ku 10`ê Kanûnê bû.

Heyder destnîşan kir ku ji bo xilaskirina gelê Sûriyê ji şer, derketina MSD`ê pêwîstiyek bû û got: “Aliyên tev li damezirandina MSD`ê bûne, avakirina Sûriyeyeke demokratîk a pirreng û nenavendî armanc dikin ku dê pirsgirêkên li Sûriyê çareser bike û rê li pêşiya mudaxeleyên Tirkiyê di kar û barên gelê Sûriyê de bigire.”

BI SAYA TÊGÎNA BERXWEDANÊ EM NEBÛN QURBANA SIYASETÊN QIRKIRINÊ

Endamê Partiya Yekitiya Demokratîk (PYD) Menan Cafer destnîşan kir ku destwerdana Tirkiyê di Sûriyê de, azarên gelê Sûriyê zêde kirin û got: “Ji xwe dewleta Tirk li ser qirkirina gelên herêmê ava bûye. Ev siyaseta wê hîna heta îro berdewam e. Bi saya berxwedana gelê Kurd, ew tune nebû.”

(şx)

ANHA