​​​​​​​‘Heta agahî li ser rewşa rêber Ocalan bên em ê têkoşînê bilind bikin’

Dewleta Tirk a dagirker di tecrîda li dijî rêber Abdullah Ocalan de dewam dike û ji 20 mehan ve tu agahî li ser rewşa wî ya tenduristî nehatin girtin.

Di Îlonê de CPT’yê serdana girtîgehên dewleta Tirk kir û diyar kir ku bi rêber Ocalan re civiyaye û piştre derket holê ku CPT bi rêber Ocalan re neciviyaye.

Ji ber wê bertek û xwestekên gel ên pêkanîna azadiya fîzîkî ya rêber Abdullah Ocalan û aşkerakirina rewşa wî ya tenduristî zêde bûn.

Têkildarî mijarê, welatiya bi navê Leyla Hisên da zanîn ku daxuyaniya CPT′ê ya piştî serdana wê ji girtîgeha Îmraliyê ku bi rêber Ocalan re civiya û piştre hate aşkerakirina pê re neciviyaye, nîşaneya durûtî û derwtiya wê ye.

′EM Ê HETA ŞIKANDINA TECRÎDÊ Û PÊKANÎNA AZADIYA RÊBER OCALAN LI QADAN BIN′

Leyla wiha got: "Em ê li hember Erdogan, siyasetên wî û dewletên ewropî yên kapîtalîst ku alîgiriya wî dikin têkoşîna xwe bilind bikin."

Her wiha Hediye Ebdo jî wiha got: “Armanc ji derketina wan li qadan ew e ku rewşa rêber Ocalan ku zêdetirî 20 mehan agahî jê nayên girtin, bizanin, her wiha em helwesta xwe li hember tecrîdê û durûtiya CPT′ê nîşan bidin. Em ê heta şikandina tecrîdê û pêkanîna azadiya fîzîkî ya rêber Ocalan li qadên berxwedanê bin.”

Hediye wiha li gotina xwe zêde kir: "Girêdana gel bi rêbertî ve û girêdana rêbertî bi gel ve qut nabe û em gel dê her li qadên berxwedanê bin û dê girêdana me bi rêbertî re ji her demê zêdetir be û bi azadiya fîzîkî ya rêber Ocalan dê aştî li herêmê misoger be."

′EM Ê DI VÊ SEKNA XWE DE BI VÎNEKE XURT DEWAM BIKIN′

Afram Somî yê ji pêkhateya Suryan jî wiha got: "Hemû peyman, mîsaq û planên pêk tên dê bi bin bikevin. Em gelekî li ser felsefeya rêber Ocalan ku felsefeya jiyana hevbeş û birûmet e perwerde bûne."

Somî wiha domand: "Em ê di vê sekna xwe de bi vîneke xurt li hember her kesên hewl bidin vîna me têk bibin bisekinin. Ji ber ku em hêza xwe ji felsefeya rêber Ocalan werdigirin û dê ji berê xurttir bin."

Somî bal kişand ser hewlên CPT′ê û ev tişt anî ziman: "CPT′ê xwest derbeyê li vîna gelê bi awayekî xurt bi felsefe û fikirê rêber Ocalan ve girêdayî ye bide."

Somî wiha dawî li gotina xwe anî: "Rêber Ocalan xwest peyamekê ji tevahî pêkhateyan (Suryan, Kurd û Ereban) re bişîne, lê hêzên dijber ji nav jî CPT′ê hewl dide li hember vê yekê bisekine."

′ZILM MAYÎNDE NAMÎNE, DÊ VÎNA BI SER BIKEVE’

Salih Omer jî bal kişand ser meş û xwepêşandanên girseyî yên gel ên bi armanca şermezarkirina tecrîda li dijî rêber Ocalan û got: "Zilm mayînde namîne û dê vîn bi ser bikeve."

Omer di dawiya de got: "Gelo bêyî behsa doza tecrîdê bê kirin hûn ê çawa demokrasî û aştiyê pêk bînin? Ev ne pêkan e. Divê hûn baş bizanin ku bêyî şikandina tecrîda li dijî rêber Ocalan li Tirkiyê tu demokrasî pêk nayê."

‘EM Ê BERXWEDANA ÎMRALIYÊ JI XWE RE BIKIN ESAS’

Selman Nebhan ê ji pêkhateya Ereb wiha got: "Ji 20 mehan ve tu agahî li ser rewşa rêber Ocalan nehatine. Hemwextî êrişên li dijî Bakur û Rojhilatê Sûriyê re tecrîda girantir dibe. Helwesta me ji van siyasetan aşkera ye, ew jî ew e ku em li kêleka berxwedana mezin a ku rêber Ocalan di Îmraliyê de pêk tîne de disekinin û li hember van êrişan in."

Der barê îdiayên CPT′yê ku serdana Îmraliyê kiriye, rewşên girtiyan şopandiye û bi rêber Ocalan re civiyaye û piştî hate aşkerakirin ku pê re neciviyaye yan jî rêber Ocalan qebûl nekir pê re bicive Nebhan ev tişt got: "Helwesta wê şermînî, mixabînî, derewî û durûtî ye û baweriya hemû gelan ji dest da."

Selman Nebhan wiha dawî li gotina xwe anî: "Armanca sereke ji tecrîda girankirî gel ji rêber Ocalan were bidûrxistin. Lê em, pêkhateyên Bakur û Rojhilatê Sûriyê bi fikirê Rêbertî ve girêdayî ne û dê heta şikandina tecrîdê û pêkanîna azadiya fîzîkî tê bikoşin."

(fr)

ANHA