Li Hesekê bi hezaran banga azadiya fîzîkî ya Rêber Ocalan kir

Bi hezaran şêniyên Hesekê bi hemû pêkhateyên wê, bi meşekê tecrîda li Îmraliyê şermezar kir û xwest ku Rêber Ocalan fîzîkî were azadkirin.

Meş ji çexerêya Şehîd Arîn a li taxa Mişêrfê dest pê kir. Şêniyan posterên Rêber Ocalan, alên TEV- DEM, Kongra Star û PKKʹê hildan û bênavber dirûşmên "Bê serok jiyan nabe" û "Bijî serokê Apo" berz kirin.

Meş li qada Xeto ya taxa Nasira veguherî mîtîngê. Bi navê PYDʹê Mihêdî El Dixêm axivî û got, "Em li vir kom bûne da ku ji dewleta Tirk a dagirker re bêjin ku hûn nikarin Rêbertî ji gel qut bike, em teslîm nabin û em ê banga azadiya fîzîkî ya Rêbertiya xwe bidomînin."

Mihêdî El Dixêm bêdengiya navneteweyî ya li hemberî zextên dewleta Tirk a dagirker ên li ser girtiyan û êrişên wê yên li ser Bakur û Rojhilatê Sûriyê şermezar kir.

Endama Koordînasyona Kongra Star a kantona Hesekê Xalida Bûtî jî bang li gelên Bakur û Rojhilatê Sûriyê kir ku têkoşîna ji bo azadiya fîzîkî ya Rêber Ocalan xurt bikin û got: "Jinên Bakur û Rojhilatê Sûriyê azadiya xwe di ramanê Rêbertî de dibînin."

Mîtîng bi berzkirina dirûşmên "Bê serok jiyan nabe" bi dawî bû.

(bb)

ANHA