Nasnameya şervanê di êrişa li Qamişloyê de şehîd bûbû eşkere bû

Navenda Ragihandinê ya QSDʹê daxuyand ku şervanê wan Kemal Mihemed Elî Dûdû 6ʹê Mijdarê di êrişa hewayî ya dewleta Tirk a dagirker a li ser Qamişloyê de şehîd bûye.

Daxuyanî wiha ye:

“Hêzên dagirkeriya Tirk êriş û binpêkirinên xwe li ser herêmên cuda yên Bakur û Rojhilatê Sûriyê didomînin, bi hemû cure çekên giran û dronan sivîlan, milkên wan, cihên aktîf û yên xizmetguzarî û leşkerî dikin hedef.

Roja şemiya borî balafireke bêmirov a dagirkeriya Tirk erebeya ku hevreyê me Mîtan Şoreş (Kemal Mihemed Elî Dûdû) û 2 hevalên wî tê de bûn, kir hedef. Di encama vê êrişa nemerd de hevalê me Mîtan ê ku bêhnvedana xwe li nav xizmên xwe diborand, şehîd bû.

Hevreyê me beşdarî piraniya pêngavên li dijî rêxistinên terorîst ên li herêmên Bakur û Rojhilatê Sûriyê bû. Hevreyê me mînaka şervanên wêrek bû ku ji xetereyan natirsin û di jiyana xwe ya leşkerî de nimûneyên bêhempa yên berxwedan û lehengiyê nîşan dan. Her wiha xwedî rihê hevalatî yê bilind bû, ji lew re re ket dilê hemû kesên wî nas kirine û ji wan re bû bira û heval.

Em sersaxiyê ji xwe, malbata şehîd û hemû malbatên şehîdan û gelê xwe re dixwazin û em soza rakirina tolê didin. Em ê ala berxwedanê li ba bikin, xeta têkoşîna fedaîtiyê bidomînin heta ku xeyal û armancên wan ên azadî, rizgarkirina herêmên dagirkirî û mîsogeriya ewlehî û îstiqrarê li herêmên me pêk bînin.

Nasnameya şehîd wiha ye:

Nasnav: Mîtan Şoreş
Nav û paşnav: Kemal Mihemed Elî Dûdû
Navê dayikê: Ebta
Navê bav: Mihemed Elî
Cih û dîroka jidayikbûnê: Serêkaniyê, 1995
Cih û dîroka şehadetê: Qamişlo, 6 Mijdar 2022."