Komxebata Diyalogê ya Jinan bi encamnameyê bi dawî bû

Komxebata Diyalogê ya Jinan du rojan dewam kir. Her wiha îro bi xwendina encamnameyê bi dawî bû ku ji 11 bendan pêk tê.

Piştî li ser mijara duyemîn a komxebatê nîqaş hatin kirin, beşdaran bend û encamnameya dawîn a komxebatê nîqaş kirin.

Pitî nîqaşên berfireh, li ser daxuyaniya ku ji aliya çalakvan Necwa Tawîl ve hatiye xwendin, hat lihevkirin û Komxebata Diyalogê ya Jinan bi dirûşma Jin û guhertina demokratîk li Sûriyê bi dawî bû.

Encamnameya dawî ya komxebatê wiha ye:

Komxebata Diyalogê ya Jinan a Sûriyê  bi dirûşma Jin û guhertina demokratîk a li Sûriyê bi hevkariya Malbenda Helebê ya Rewşenbîrî li dar ket. Komxebat du rojan; 28-29`ê Cotmehê li dar ket. Tê de jinên sûrî yên ji parêzgehên cuda beşdar bûn û tê de du mijarên sereke hatin nîqaşkirin:

Mijara yekemîn nasnemeya niştîmanî ya Sûriyê û ya din jî rola jinan di guhartina demokratîk de ber bi nenavendiyê ve hatin nîqaşkirin.

Piştî nîqaşan, beşdaran li ser van bendan li hev kir:

-Girîngiya û pêwîstiya avakirin û diyarkirina nasnameyeke nîştimanî ya komker.

-Girîngiya rola jinan ku tev li jiyana siyasî û kar û barên giştî bibin.

-Nasnameya nîştimanî ya komker li gorî rêgezên edalet, azadî, îtîrafkirin, qebûlkirina aliyê din û redkirina paşguhkirin û înkarkirinê pêk tê û ava dibe.

-Ji bo guhertina reftariya civakî ku tevlêkirina jinên sûrî û aktîfkirina rola wê di civakê de sînordar dikin, divê kar û xebatên cidî li dar kevin.

-Pêwîstiya tevlêkirina jinan di xebatên siyasî û sazkirina destûrê de ku mafên wê dabîn dike.

-Nenavendîbûn, wesîle ye ne armanc e da ku rêveberiyeke çalak, kolektîf, demokratîk, zelal û a ji bo pêkanîna geşepêdaneke domdar û jiyaneke baştir ji sûriyan re, pêwîst e.

-Nenavendîbûn, parvekirina kar û erkan di navbera navend û saziyên xwecih de ye û nayê wateya bidawîkirina desthilata navendê.

-Teqezî bi diyaloga sûrî-sûrî were kirin da ku nêrîn bibin yek û bigihêjin lihevkirinan û aloziya Sûriyê çareser bibe.

-Teqezî bi girîngiya rola jinan di pêkanîna aştiyê û bidawîkirina şer û dagirkirinê de were kirin.

-Xurtkirina kar û xebatên jinan û yekirina wan ji bo piştgiriya dozên jinan û civakê.

-Rola jinan di xurtkirina hevgirtina civakî û aştiya navxweyî girîng e.

(dm)

ANHA