Şehîd Êriş Hemdûş li Kobanê bi merasimekê hat oxirkirin

Şêniyên herêma Firatê û endamên saziyên sivîl, kesayetên ji partiyên siyasî yên herêm beşdarî merasima oxirkirina cenazeyê şervanê Hêzên Komandos Hemed Beşar (Êriş Hemdûş) bûn, ku di 9`ê Cotmehê de li navçeya Eyn Îsayê di êrişa hewayî ya dagirkeriya Tirk de şehîd bûbû.

Di merasimê de endama rêveberiya Meclisa Navçeya Qinayê Suad Eldemir wiha axivî: “Têkoşîna me berdewam e, rêya xayinan kin e, çi bikin jî dê nikaribin berxwedan û israra me têk bibin. Her kesê hewl bide li pêşiya me bisekine, dê çarenûsa wan wekî ya DAIŞ`ê be.”

Endamê Desteya Rêveber a Partiya Yekitiya Demokratîk (PYD) Ehmed Xoce jî got: “Komploya li dijî me pir mezin e, dewletên mezin li pişt wê ne wekî dewleta Tirk a dagirker û Îranê, ku hewl didin berjewendiyên xwe pêk bînin û nexşerêyeke nû ji herêmê re xêz bikin û hin herêman tev li xaka xwe bikin.”

Ehmed Xoce piştrast kir ku ew xwediyên projeyeke demokratîk in ku dê hemû planan û timayên derve pûç bike û got: “Îro şehîdên me dibêjin êdî bese û welatekî ewle ji me re ava dikin ku tê de hemû pêkhate bi azadî bijîn.”

Xoce her wiha bang li şêniyên herêmê kir ku xayinan ji nav xwe derxin û rê nedin wan ku aramî û istiqrara herêmê têk bibin.

Di dawiya merasimê de wesîqeya şehîd hat xwendin û radestî malbatê hat kirin û cenazeyê wî li Goristana Şehîd Dicle hat veşartin.

(cx)

ANHA