Koçberên Serêkaniyê dûrî warê xwe zivistaneke din pêşwaziya dikin

Gerînendetiya Kar û Barên Penaberan a Herêma Cizîrê, ji bo sivikkirina bar û azarên koçberên li kampan, li gor derfetên heyî dest bi amadekariyan kir.

Di 9’ê Cotmeha 2019’an de, artêşa Tirk a dagirker êrişeke hovane li dijî bajarê Serêkaniyê pêk anî, di encamê de bi hezaran şêniyên herêmê ber bi bajarê Hesekê ve koçber bûn, wê demê jî Rêveberiya Xweser kampên “Waşûkanî” û “Serêkaniyê” ava kir  da ku koçber tê de werin bicihkirin.

Bi hatina demsala zivistanê re, niştecihên her du kampan tevî derfetên kêm û paşguhkirina rêxistinên navneteweyî amadekariyan dikin. Koçberê bi navê Elî Tewîl ê ji niştecihên kampa Serêkaniyê diyar kir ku wan dest bi peydakirina xwarinê û pînekirina konên riziyayî kirine.

Tewîl wiha domand: “Dema em ji herêmên xwe bi darê zorê derketin me baş dizanîbû ku em ê di rewşên xerab re derbas bibin, lê belê heta em xaka xwe rizgar bikin em ê li hember van rewşan li ber xwe bidin. Hêviya me ya vegerê mezin e.”

'HEBÛNA DAGIRKERIYA TIRK VEGERA ME ASTENG DIKE’

Têkildarî rewşa Serêkaniyê, Tewîl wiha pê de çû: "Dagirkeriya Tirk hewl dide bi hemû awayan çanda herêmê tune bike û fîtneyê di navbera pêkhateyên wê de derxîne da ku ji hev dûr bikevin û civak têk biçe."

Koçbera bi navê Îda Semo jî wiha axivî: “Di aliyê xizmetguzariyê de pêwîstiyên me gelek in, wek sererastkirina konan û çêkirina rêyên hundirê kampê.”

Îda Semo diyar kir ku tevî ku rêyên di navbera konan de bi xîzê hatine sererastkirin jî, lê ji ber rewşên hewayî û tevgera welatiyan dîsa ew xîz belav bûn û rewşa rêyan xirab bû.

Îda Semo ev tişt anî ziman: "Daxwaza me ya sereke em vegerin malên xwe piştî dagirker jê derkevin. Çima civata navneteweyî li hember sûcên dewleta Tirk a dagirker û çeteyên wê ji bêdengiya xwe dernakeve?"

Koçberê bi navê Şêx Salih Şêx Mihemed bicihkirina çeteyên dagirkeriya Tirk li Serêkaniyê şermezar kir û got: “Dewleta Tirk îdia dike ku ew ê herêmê radestî niştecihên wê yên resen bike, lê belê koçberên di kampan de niştecihên resen bi xwe ne.”

Mihemed destnîşan kir ku armanca dagirkeriya Tirk guhertina demografiya ya herêmê ye û got: “Tevî rewşa zehmet heta rizgarkirina herêmên xwe em ê li kampan li ber xwe bidin.”

Der barê amadekariyên Gerînendetiya Kar û Barên Penaberan a Herêma Cizîrê yên li kampên Serêkaniyê û Waşûkanî de, hevserokê gerînendetiyê  Feyruşah Remedan diyar kir ku ji bo peydakirina pêdiviyên koçberan ew bi rêxistinên mirovî re têkildar in.

Remedan wiha lê zêde kir: “Rêveberiya Xweser ji bo nûkirina konan, belavkirina sobe û mazotê û cilên zivistanê, bi meclisên herdu kampan re koordîneyê dike.”

Remedan da zanîn ku amadekariyên wan berfireh in, hem di aliyê peydakirina xwarinê hem jî ya derman û hemû pêdiviyên din ên koçberan de û ev li gotinên xwe zêde kir: “Her çiqas dagirkeriya Tirk êrişan li dijî herêmê pêk bîne jî, her em ê ji gel re bibin pir û alîkariya wî bikin.”

Endamê rêveber ê Nivîsgeha Têkiliyan a herdu kampan Riyad Mirî da zanîn ku di kampa Serêkaniyê de 14 hezar û 548 kes û di kampa Waşûkanî jî 16 hezar kes hene.

Hevserokê Gerînendetiya Kar û Barên Penaberan a Herêma Cizîrê Feyruşah Remedan bang li rêxistinên hiqûqî û navneteweyî nexasim Neteweyên Yekbûyî (NY) kir ku alîkariya koçberên Serêkaniyê bikin û dagirkeriya Tirk ji herêmê derxin, da ku niştecihên resen vegerin warê xwe.

(mh)

ANHA