Ji bo şehîd Hevrîn Xelef merasima bîranînê hat lidarxistin

Serkertera Giştî ya berê ya Partiya Sûriya Pêşerojê Hevrîn Xelef tevî ajokarê xwe Ferhad Remedan di 12`ê Cotmeha 2019`an de li ser rêya M4 ji aliyê çeteyên artêşa Tirk a dagirker ve hat şehîdxistin.

Di salvegera sêyemîn a şehadeta Hevrîn de, Partiya Sûriya Pêşerojê li pêş navenda xwe ya li Taxa Nasira ya Hesekê merasima bîranînê li dar xist.

Di bin konê merasimê de wêneyên şehîd Hevrîn Xelef û Ferhad Remedan hatin daliqandin.

Bi dehan endamên Kongra Star, Partiya Sûriya Pêşerojê, TEV-DEM`ê û saziyên Rêveberiya Xewser ên li kantonê û navçeyên wê beşdarî merasimê bûn.

Serokê Nivîsgeha Têkiliyan a Partiya Sûriya Pêşerojê Salih Zewbe axivî û behsa têkoşîna şehîd Hevrîn kir û wiha got: “Şehîd Hevrîn têkoşer bû û heta dema şehadeta xwe ji bo avakirina Sûriyeke azad û demokratîk kar kir.”

Endama Kongra Star Cûmana Ubêd jî got: “Şehîd Hevrîn girîngiyeke mezin da doza jinan û xwest ku jin jiyaneke ewle dûrî zilm û zordestiyê bijîn.”

Cûmana hemû şehîdên ku di oxira bidestxistina azadiya jinan de xwe feda kirine, bi bîr anîn.

Merasim bi dirûşmeya silavkirina têkoşîna şehîd Hevrîn Xelef û dilsoziya bi şehîdan re bi dawî bû.

ANHA