Meclisa Jinan a Partiya Sûriya Pêşerojê civîneke berfireh li Hesekê li dar xist

Civîn li hola Reşo ya bakurê bajarê Hesekê bi amadebûna endamên jin ên Partiya Sûriya Pêşerojê û Kongra Star hate lidarxistin.

Di civînê de berdevka Meclisa Jinan a Kantona Hesekê Nuha El Yesawî li ser destkeftiyên jinan di hemû qadên siyasî, aborî û leşkerî de û qebûlkirina wê ya projeya neteweya demokratîk axivî.

Berdevka Meclisa Ciwanan a Partiya Sûriya Pêşerojê Lîn El Zahir jî perspektîfên siyasî û rêxistinî yên Meclisa Giştî ya Jinan a Partiya Sûriya Pêşerojê xwendin û got: "Ji destpêka damezrandina Partiya Sûriya Pêşerojê ve jinan bi rêya nivîsgehên xwe yên taybet, xwe bi rêxistin kirin. Roleke wan a sereke di nava partiyê de hebû. Di encama keda wê de û li ser esasê biryarên kongreya duyemîn a partiyê, di encama ked û fedekariyên mezin ên jinan de, Nivîsgeha Jinan veguherî Meclisa Jinan."

Lîn El Zahir wiha domand: "Di heyama du salan de, me ji bo yekkirina prensîb û armancên meclisê û mekanîzmaya karkirina wê bi rêya hevahengî, perwerdekirin û pêwendiya demkî kar kir da ku em bighêjin rêxistineke bihêz ku bikare di pêvajoya siyasî de, di qada civakî de û di hemû astên îdarî de pêşengiya qonax û nûnertiya siyasî bike."

Lîn El Zahir bal kişand ser rola girîng a Partiya Sûriya Pêşerojê di pêşeroja Sûriyê de û herî dawî wiha got: "Di pêşketina gelê Sûriyê de û serkêşiya qonaxeke dijwar û girîng di jiyana sûriyan û dîroka Sûriyê de, herwiha di afirandina tecrûbeyeke nû ya demokratiyê û têkoşînê de, roleke stratejîk ya partiyê heye."

Berdevka Meclisa Jinan a Partiya Sûriya Pêşerojê ya Hesekê Êvîn Mihemed jî behsa xebatên herî sereke û girîng ên meclisê kir.

Civîn bi şopandina rêya şehîdan û bi taybet şehîd Hevrîn Xelef; sekretera Giştî ya berê ya Partiya Sûriya Pêşerojê bi dawî û dê heya avakirina Sûriyeke demokratîk ne navendî, li ser şopa şehîdan bin.

(hs)

ANHA