Li bajarê Reqayê amadekariyên Pêşbirka Hespên Erebî tên kirin

Pêşbirka hespan yek ji werzîşên herî girîng ên bajarê Reqa û gundewarê wê ye. Ev pêşbirk mîraseke herêmê ye û ji aliyê xelkê bajar û gundewarên wê ve tê parastin.

Di çarçoveya amadekariyên Pêşbirka Hespên Erebî yên Esîl de  ku dê li qada Siwariyê ya li Reqayê were organîzekirin, cihê hespan, qada pêşbirkê bi av û kehrebeyê tên hazirkirin.

Endamê rêveber ê Lîwa Ceyş El Siwar (Tûgeya Artêşa Şoreşgeran) û endamê Partiya Sûriya Pêşerojê Mihemed El Erac got: "Hemwextî gefên dewleta Tirk ên li ser Bakur û Rojhilatê Sûriyê, divê em kar bikin û nîşan bidin ku em ji bo fedekarî û parastina vê xaka ku bi xwîna şehîdên me hatiye avdan û ji bo parastina serkeftinên ku Rêveberiya Xweser bi dest xistine, amade û hazir in. Em ê karekî nû bikin, ew jî pêşbaziyê ya hespên erebî yên li herêmê ye."  

El Erac her wiha got: "Bi pêşengiya Fermandariya Giştî ya Artêşa Şoreşgeran û bi hevkariya Komîteya Ciwan û Werzîşê ya Meclisa Sivîl a Reqayê re, em ê qada pêşbirkê amade bin ku wê xwedî taybetmendî be ."

Mihemed El Erac spasiya Meclisa Sivîl a Reqayê kir ku bi wan re bûye alîkar û hemû alavên pêwîst ji bo pêşbirkê pêşkêş kirine.

Ji aliyê xwe rêveberê Komîteya Ciwan û Werzîşê Macid El Salih jî wiha got: "Me dest bi amadekirina qada pêşbirkê, paqijkirina wê ji kevir û stiriyan, cihê temaşevanan û peydakirina av û kehrebeyê kiriye."

Macid El Salih anî ziman ku ev pêşbirk wê li ser asta  Bakur û Rojhilatê Sûriyê were lidarxistin û destpêka meha Îlona bê dest pê bike.

Hêjayî gotinê ye ku bajarê Siwariyê li bajarê Reqayê li ser asta Sûriyê yê mezintirîn e, di sala 1969'an de hatiye damezrandin û di sala 1991'ê de bi awayekî fermî li ser rûberek ji 440 donim erd hatiye vekirin. Şampiyoniya navneteweyî ya "Samsung" jî ku hespên ji Lubnan û Urdunê jî tê de beşdar bibûn, li vê derê hatibû organîzekirin.

(hs)

ANHA