Ji ber ambargoya hikumeta Şamê li Nexweşxaneya Avrîn derman nemane

Artêşa Tirk a dagirker 24`ê Tebaxê bi balafirên bêmirov êrişî navçeya Til Rifetê kir, di encamê de 3 welatî şehîd bûn û 6 kesên din birîndar bûn. Ji birîndaran Zuhêr Ebdulrehman Mihemed jî îro şehîd bû.

Birîndar veguhastin Nexweşxaneya Avrîn a navçeya Fafînê ya kantona Şehbayê, lê ji ber ku hikumeta Şamê ambargo li ser kantonê ferz kiriye, derman peyda nabin.

Têkildarî rewşa birîndaran endamê rêveber ê Nexweşxaneya Avrîn Dr. Azad Reşo got: "Di komkujiyê de 3 welatî şehîd bûn û 6 kesên din birîndar bûn. Organên hin birîndaran têk çûn û hîn jî di bin kontrolê de ne."

Reşo da zanîn ku ji ber ku ambargoya hikumeta Şamê li ser kantona Şehbayê ferz kiriye, zehmetiya peydakirina dermanan dikişînin û wiha dewam kir: "Birîndar li nexweşxaneya Til Rifetê dihatin dermankirin, lê ji ber ku derfet kêm bûn, ew rakirin Nexweşxaneya Avrîn û li vir jî zehmetî hene."

Azad Reşo bang li rêxistinên mirovî, navneteweyî û WHO’yê kir ku li hember birîndaran bi erka xwe ya exlaqî rabin.

Birîndar Menan Reşîd jî wiha got: "Em li pêş dikana xwe ya di kolana serdekê de rûniştibûn, di dema teqînê de, min tenê parçeyên welatiyan dîtin û ez jî birîndar bûm."

Reşîd wiha domand: "Dagirkeriya Tirk em ji Efrînê bi darê zorê koçber kirin û hewl dide tirsê bixe nava me, da ku me ji Til Rifet jî koçber bike. Lê em ê heta rizgarkirina herêmên xwe, li ber xwe bidin."

Artêşa Tirk a dagirker di navbera 2019 û 2021`an de li dijî koçberên Efrînê ku piraniya wan zarok bûn, 2 komkujî pêk anîn. Di encamê de 13 welatî şehîd bûn ku ji wan 10 zarok bûn.

(eh)

ANHA