ENKS hewl dide koçberên li Başûr bişîne Efrîna dagirkirî

Di demekê de ku dewleta Tirk a dagirker li dijî herêmên Bakur û Rojhilatê Sûriyê gefên êrişên dagirkirine dixwe, ENKS û Abdulhekîm Beşar hewl didin pênaberên ji Rojavayê Kurdistanê yên li kampên li Başûrê Kurdistanê dimînin, bişînin Efrîna dagirkirî û ciwanan jî tev li çeteyan bikin.

Li gorî çavkaniyên ajansa me ji me re ragihandiye, (ENKS) û bi taybet jî rêveberê ENKS’ê û damezirînerê PDKS’ê Abdulhekîm Beşar, ketine nava hewldanan da ku malbatên li kampên Domîz û Gewrebiskê yên Başûr û nemaze malbatên nêzî ENKS bibin Efrîna dagirkirî û ji bo vê yekê jî bi dewleta Tirk re kar dikin.

ENKS û Abdulhekîm Beşar bi vê yekê dixwazin bidin nîşandan ku Efrîn qaşo aram e û bi van rêbazan dixwaze sûcên dagirkeran veşêre.

Duh (18`ê Tebaxê) Abdulhekîm Beşar li kampên navborî civîn çêkirin da ku malbatên ku ji Qamişlo û Dêrikê yên beriya sala 2012`an çûne Başûrê Kurdistanê, bibin Efrînê û ciwanan wan jî tev li çeteyan bikin.

Hêjayê bibîrxistinê ku ENKS ne tenê di “Meclîsa Sivîl a Efrînê” de ku ji aliyê MÎT’ê ve li Dîlokê hatibû avakirin, her wiha di nava polîsên çeteyên girêdayî dewleta Tirk de jî cih digire. Gelek perwerdeyên ku ji aliyê MÎT`ê ve li Efrînê tên lidarxistin, ENKS cihê xwe tê de digire.

ANHA